Azərbaycan Respublikasının Prezidenti yanında Gənclər Fondunun maliyyə dəstəyi ilə “CİNEMA” Gənc Kinematoqrafçılar Mərkəzi “Audiovizual məhsullar və beynəlxalq festivallara çıxma yolları” adlı layihəyə start verib.

Bu sözləri “CİNEMA” Gənc Kinematoqrafçılar Mərkəzinin sədri Fehruz Şamiyev film sahəsində beynəlxalq arenaya çıxmağın yolları haqda Axar.az-a danışarkən deyib. O, bu sahədə maarifləndirmənin aparılmasının zəruri olduğunu deyib:

“Son illər ölkəmizdən kənarda keçirilən beynəlxalq festivallarda iştirak edən azərbaycanlı kinematoqrafçıların yaş həddi 35-dən yuxarıdır. Doğrudur, bəzi gənclər də festivallarda iştirak edir, amma onların sayı barmaqla sayılacaq qədərdir. Bəzən bu problemin kökündə keyfiyyətli məhsulun olmaması yox, festivallara çıxmaq üçün qaydaları bilməmək, filmin janrından, formasından asılı olaraq lazımı festivala göndərilməməsi dayanır. Bundan başqa, xaricə çıxacaq keyfiyyətli məhsulların azlığına səbəb bu sahədə ustad dərslərinin demək olar ki, keçirilməməsindədir. Digər sahələrdən fərqli olaraq, kino sahəsində təşkil olunan ustad dərslərinin sayı lazım olduğundan azdır”.