Bu gün gözəl Gövhərin çəkildiyi ilk filmin təqdimatına birlikdə getdik və onu təbrik etdik.

Kult.az xəbər verir ki, bu sözləri millət vəkili Qənirə Paşayeva vaxtsız dünyadan köçən əməkdar artist Xanım Qafaqovanın qızının da çəkildiyi “Big Bubble əməliyyatı” filminin Nizami Kino Evində keçirilən təqdimat mərasimi haqda bildirib. Millət vəkili qeyd edib ki, filmin təqdimatı 1 saatdan artıq gecikdiyi və başqa önəmli tədbirə dəvət aldığı üçün getmək məcburiyyətində qalıb və filmi seyr edə bilməyib:

“Amma mütləq bu filmə baxacam və bu uşaq filmi ilə bağlı fikrimi paylaşacam. Amma Gövhərin yaxşı oynadığına əminəm. Təqdimatdan öncə yaxınlaşıb “Gövhəri təqdim edib çağıranda sual da verəcəklər, nə deyəcəyi barədə danışmısınızmı” deyə sorduqlarında “ağıllı qızdı, ona heç bir şey öyrətmək lazım deyil, qoy içindən nə gəlirsə, onu söyləsin” dedim. Gövhər isə qırmızı xalıdan hər kəsə təbəssüm bəxş edərək keçdi və aparıcının sualına “aktrisa olmaq istəyirəm” deyə cavab verdi. Rəhmətlik anası Xanım Qafarovanın istedadı və həvəsi, demək, ona da keçib. Nənəsi Gövhər xala isə çox duyğusal anlar yaşadı. Çünki Gövhər indi onu həyata bağlayan ən güclü bağdı”.

Qeyd edək ki, sevimli aktrisa, əməkdar artist Xanım Qafarova 2014-cü ildə, 47 yaşında ağır xəstəlikdən dünyasını dəyişib. Gövhər onun yeganə övladıdır.