Bu gün Mərkəzi Elmi Kitabxanada “Məsəllər və deyimlər etimoloji lüğəti” və “Koroğlu dastanının lüğəti” kitablarının təqdimat mərasimi keçirilib.

Kult.az xəbər verir ki, tədbiri giriş sözü ilə açan professor Qulu Məhərrəmli hər iki kitabla bağlı fikirlərini bölüşüb.

Daha sonra Azərbaycanda Atatürk Mərkəzinin müdiri, akademik, millət vəkili Nizami Cəfərov yeni nəşr olunmuş kitabların əhəmiyyətindən və xüsusən də dil mövzusunun qloballaşan dünyadakı yerindən danışıb:

“Dil xalqın milli kimliyinin daşıyıcısıdır. Dili qorumaq xalqı qorumaq deməkdir. Bu gün biz bir sıra sferalarda dillə bağlı pozuntularla qarşılaşırıq. Ancaq düşünürəm ki, hazırda dilimizin danışıq qaydalarında olan problemlər özünü daha qabarıq büruzə verir. Təqdim olunan bu kitablar da xalqa xidmətin bariz nümunəsidir”.

“Koroğlu dastanının lüğəti” kitabının müəllifi, Bakı Slavyan Universiteti Azərbaycan dili və onun tədrisi metodikası kafedrasının dosenti, filologiya elmləri namizədi Şəhla Əhmədova və “Məsəllər və deyimlər etimoloji lüğəti” kitabının müəllifi, “Altun kitab” nəşriyyat evinin rəhbəri Rafiq İsmayılov çıxışlarında kitabların hazırlanma mərhələləri haqqında tədbir iştirakçılarına məlumat veriblər.