Mayın 3-də Azərbaycan Dillər Universitetində (ADU) “Xəzərdən Dunaya qədər” adlı sənədli filmin təqdimat mərasimi keçirilib.

Kult.az xəbər verir ki, ümummilli lider Heydər Əliyevin anadan olmasının 96-cı ildönümü ərəfəsində keçirilən tədbirlər planı çərçivəsində 9 May Qələbə gününə həsr olunan tədbir Tələbə Elmi Cəmiyyəti (TEC) və Serb dili və mədəniyyəti mərkəzinin birgə təşkilatçılığı ilə baş tutub.

223-cü diviziyanın komandiri olmuş Baxış Mehdiyevin “Qırmızı bayraqlı 223-cü Belqrad diviziyası” adlı kitabının motivləri əsasında lentə alınmış sənədli film Yuqoslaviyanın azad olunması uğrunda döyüşən azərbaycanlılardan ibarət 223-cü Belqrad diviziyasından bəhs edir.

ADU-nun rektoru, akademik Kamal Abdulla gənc nəslin formalaşmasında filmin böyük əhəmiyyətinin olduğunu bildirib:

“Film son dərəcə təsirlidir. Orta və yaşlı nəsil bu filmin bədii təsirini daha yaxşı hiss edir. Ən vacib məqamlardan biri odur ki, biz tariximizin bilmədiyimiz hissələrini öyrənməyə başlayırıq. Sanki yavaş-yavaş əsl tarixdən uzaqlaşırıq, onun bədii variantını dərk və qəbul edirik. Biz Mehdi Hüseynzadəyə, Həzi Aslanova minnətdar olduğumuz kimi, adlarını bilmədiyimiz minlərlə azərbaycanlı zabitlərə də minnətdar olmalıyıq. Filmdə şəhərlərin azad olunmasını yox, həm də o zaman keçirilən sevinci gördük. Sevinirəm ki, bu cür filmlərlə tariximiz tələbələrimizin yaddaşına yazılır”.

Təqdimatda ADU-nun Elmi işlər üzrə prorektoru Sevinc Zeynalova, TEC-in sədri Zəhra Hüseynova, Serb dili və mədəniyyəti mərkəzinin direktoru Lalə Məcidova, filmin rejissoru Tahir Əliyev, “Azərnəşr”in baş redaktoru, əməkdar jurnalist Əlövsət Ağalarov, Bakı Dövlət Universitetinin (BDU) Dünya ədəbiyyatı kafedrasının müdiri, serbşünas Cəlil Nağıyev çıxış ediblər.

Tədbir filmin müzakirəsi və sualların cavablandırılması ilə yekunlaşıb.