Xəbər verdiyimiz kimi, Azərbaycan Prezidenti İlham Əliyev Azər Mustafazadəni 2-ci dərəcəli “Əmək” ordeni ilə təltif edib.

Axar.az xəbər verir ki, Azər Mustafazadə 1939-cu il martın 27-də Bakıda ziyalı ailəsində anadan olub. 1972-ci ildən 1983-cü ilə qədər Moskvada SSRİ Yazıçılar İttifaqında Azərbaycan Ədəbiyyatı üzrə Şuranın məsul katibi vəzifəsində işləyib. Moskvada çalışdığı illərdə o, Mirzə İbrahimovun, Süleyman Rəhimovun, Fərman Kərimzadənin, Sabir Əhmədlinin, Kamal Abdullanın və başqalarının əsərlərini rus dilinə çevirərək Moskvanın nüfuzlu nəşriyyatlarında çap etdirib. Bundan başqa, Moskvada mühüm ədəbi-bədii tədbirlərin təşkil edilməsində və keçirilməsində xüsusi fəallıq göstərib.

1983-cü ildə Vətənə – Azərbaycana dəvət olunan A.Musrafazadə əvvəlcə Azərbaycan Dövlət Nəşriyyatı, Poliqrafiya və Kitab Ticarəti işləri Komitəsində sədr müavini təyin edilib. Daha sonra müxtəlif partiya vəzifələrdə çalışıb.

1990-cı ildə isə Azərbaycan Dövlət Nəşriyyatı "Azərnəşr"ə direktor təyin edilib. Azər müəllim 20 ilə yaxın ki, bu vəzifədə çalışıb.

10 aprel 2014-cü ildə Azərbaycanda nəşriyyat işi sahəsində səmərəli fəaliyyətinə görə "Şöhrət" ordeni ilə təltif edilib.