Azərbaycan rəhbərliyi Qarabağdakı Rusiya sülhməramlılarının peşəkarlığına əmindir və hesab etmir ki, onları regionda yerləşdirməklə Moskva Bakı və ya İrəvana təzyiq göstərməyə cəhd edəcək.

Axar.az xəbər verir ki, bunu Azərbaycan Prezidentinin köməkçisi Hikmət Hacıyev ABŞ-ın “Atlantic Council” analitik mərkəzinin təşkil etdiyi internet seminarda çıxışı zamanı deyib.

Onun sözlərinə görə, Azərbaycan Rusiya sülhməramlı kontingenti ilə açıq dialoqu və kommunikasiyanı dəstəkləyir.

Hacıyev, həmçinin ABŞ-ın yeni administrasiyasının Cənubi Qafqaz regionu ilə daha aktiv əməkdaşlıq edəcəyinə ümid etdiyini bildirib. O, ABŞ-ın Ermənistanla Azərbaycan arasında sülh quruculuğu prosesinə öz töhfəsini verə biləcəyini deyib. Onun sözlərinə görə, ABŞ-ın postkonflikt dövründə sülh quruculuğu ilə bağlı zəngin təcrübəsi və təşəbbüsləri var.

Hacıyev ABŞ-ın sülh quruculuğu və postkonflikt rekonstruksiyada birtərəfli, eləcə də ATƏT-in Minsk Qrupunun həmsədri kimi aktiv rol oynaya biləcəyini söyləyib.

Prezidentin köməkçisi, həmçinin Azərbaycanın işğaldan azad olunan ərazilərdə ağıllı, yaşıl şəhərlər yaradacağını və bu işdə ABŞ-ın özəl sektorunun geniş imkanları olduğunu vurğulayıb.