Ukrayna Ali Radasının sədr müavini Olena Kondratiuk Azərbaycanın Kiyevdəki səfiri Seymur Mərdəliyevlə dövlətlərarası əlaqələrin vəziyyəti və Ali Rada ilə Milli Məclisin yeni seçilmiş deputatları arasında sıx əməkdaşlığın təşviqini müzakirə edib.

Axar.az xəbər verir ki, bu barədə ukraynalı siyasətçi sosial şəbəkədə yazıb.

“Azərbaycan Respublikasının Ukraynadakı səfiri Seymur Mərdəliyevlə görüşdüm”, – Kondratiuk qeyd edib.

Tərəflər dövlətlərarası əlaqələrin vəziyyəti ilə yanaşı, “Rada ilə Milli Məclisin yeni seçilmiş üzvləri arasında sıx əməkdaşlığın təşviqi”ni müzakirə ediblər.

“Görüşdə Ukrayna və Azərbaycanın beynəlxalq sərhədlər daxilində ərazi bütövlüyü və suverenliyinin dəstəklənməsində hər iki ölkənin dəyişməz mövqeyinin əhəmiyyəti vurğulanıb. Ukraynanın enerji sektoruna göstərilən humanitar yardıma və təhsil müəssisələrinin bərpasına görə Azərbaycana təşəkkür edirik”, – parlamentin sədr müavini yazıb.

Xalq deputatı həmçinin Azərbaycanın müharibədən əziyyət çəkən ukraynalı uşaqların reabilitasiyasına göstərdiyi səyləri yüksək qiymətləndirdiyini vurğulayıb:

“Biz Azərbaycanın müharibədən əziyyət çəkən ukraynalı uşaqların reabilitasiyası üçün göstərdiyi səyləri yüksək qiymətləndiririk. Bu il Azərbaycan Əmək və Əhalinin Sosial Müdafiəsi Nazirliyinin dəstəyi ilə üç qrup ukraynalı uşaq qonaqpərvərliklə istirahət üçün qəbul edilib. Ümumilikdə bu ölkədə 180-dən çox ukraynalı uşaq sosial və psixoloji reabilitasiyadan keçib”.

“Biz 2025-ci ildə Azərbaycanda müharibənin ukraynalı uşaqlarının istirahəti və reabilitasiyası proqramının davam etdiriləcəyinə ümid edirik. Biz [bu məsələdə] cənab səfirlə razılaşdıq və bu sahədə səyləri birbaşa əlaqələndirmək tapşırığı verildi”, – Kondratiuk bildirib.