Baş Dövlət Yol Polisi İdarəsi Göygöldə iki nəfərin ölümü ilə nəticələnən yol qəzası ilə bağlı məlumat yayıb.

İdarənin şöbə rəisi, Rövşən Tağıyev Axar.az-a bildirib ki, 2 noyabr 2025-ci il, saat 23:40 radələrində Göygöl rayonunun Balçılı kəndi ərazisindən keçən Bakı-Qazax-Gürcüstan sərhədi avtomobil yolunun 371-ci kilometrində 27 yaşlı Elvin Məmmədovun idarə etdiyi “Mersedes-Benz” markalı avtomobil idarəetməni itirərək yolun sağ kənarındakı dəmir səddə çırpılıb və aşıb.

Nəticədə sürücü Elvin Məmmədov və avtomobildə olan 16 yaşlı İsmət Əliyev hadisə yerindəcə həyatını itirib, digər iki sərnişin - Sanan və Tunar isə ağır xəsarətlər alıb.

Rövşən Tağıyev qeyd edib ki, qəza anından əvvəl sərnişinlərdən biri sürücünü ehtiyatlı olmağa çağırıb:

“Ay Elvin, nəsə olsa, tikəmizi də tapmayacaqlar... Yavaş sür!” Bu cümlə bir xəbərdarlıq idi, amma təəssüf ki, eşidilmədi. Və nəticədə bir neçə ailənin həyatı alt-üst oldu. Sükan arxasında edilən bir anlıq səhv bəzən bir ömrü deyil, bir neçə həyatı yarıda qoyur. Həyat heç bir ‘cəsarət nümayişi’ və ya ‘bacarıq sınağı’ üçün qurban verilə bilməz,” - deyə şöbə rəisi vurğulayıb.

O əlavə edib ki, bu cür hadisələr bir daha göstərir ki, yol nə zarafat yeri, nə də cəsarət meydanıdır:

"Hər kilometrin sonunda həyat dayanır – ya sağ, ya da itirilmiş halda. Heç bir sürət həyəcanı bir gəncin gülümsəməsinə əvəz etməz, heç bir ‘mən bacarıram’ sözü bir ananın göz yaşını silə bilməz".

Rövşən Tağıyev bir daha sürücülərə xatırladıb ki, sükan arxasında məsuliyyətli olun, sürət həddini aşmayın, təhlükəsiz məsafəni qoruyun və hər zaman ehtiyatla hərəkət edin:

"Unutmayaq ki, yollar insanları birləşdirmək üçün çəkilib - ayırmaq üçün yox".