Səhiyyə Nazirliyi “Nyu Med” klinikasını cərimələyib.

Axar.az Teleqraf-a istinadən xəbər verir ki, Səhiyyə Nazirliyi tərəfindən klinikada keçirilən plandankənar yoxlama zamanı Fuad Abdullayevin sertifikatsız özəl praktik tibbi fəaliyyəti ilə məşğul olması faktı aşkarlanıb.

Klinika İnzibati Xətalar Məcəlləsinin 215.4-cü maddəsində nəzərdə tutulmuş inzibati xətanı törətməkdə təqsirli bilinərək 6000 manat məbləğində cərimə edilib.

Qeyd edək ki, Fuad Abdullayevin diplomu olmadan həm plastik-estetik, həm də LOR əməliyyatlar icra etməsi barədə məlumatlar bir neçə dəfə ictimailəşdirilib. Fuad Abdullayevin ixtisasca ümumi cərrah olduğu bildirilir.

Fuad Abdullayev isə bu fikirlərlə razılaşmır. Abdullayev izahatında bildirib ki, 21 ildir tibb sahəsi üzrə qanunvericiliyin tələblərinə uyğun olaraq fəaliyyət göstərir. Fəaliyyəti dövründə inzibati xəta ilə bağlı heç bir məsuliyyətə cəlb olunmayıb. Ümumi cərrah ixtisası üzrə tibb təhsilini tam şəkildə bitirib və dövlət tərəfindən həmin ixtisasa aid diplom təqdim edilib. Artıq 30 ildən çoxdur ki, tibb sahəsində peşəkar şəkildə fəaliyyət göstərir, bir neçə dövlət xəstəxanasında, hərbi hospitalda “LOR cərrahı” ixtisası üzrə fəaliyyət göstərib. Bundan əlavə, sözügedən sahə üzrə “şöbə müdiri” vəzifəsində işləyib və Həkimlərin Təkmilləşdirilməsi İnstitutunda “LOR cərrahı” ixtisası üzrə Səhiyyə Nazirliyinin tələbi əsasında kurs keçib.