Çoxmənzilli yaşayış binalarının altında yerləşən qeyri-yaşayış obyektləri ilə bağlı dövlət tikinti normaları mövcuddur və bu sahə həmin normalarla tənzimlənir.

Bu sözləri əmlak eksperti Ramil Osmanlı Axar.az-a açıqlamasında son vaxtlar yaşayış binalarının altında fəaliyyət göstərən obyektlərdə yaranan problemlərdən danışarkən deyib.

O bildirib ki, qaydalar müəyyən obyektlərin yaşayış binalarının altında fəaliyyətinə qəti şəkildə icazə vermir:

“Sahəsi 250 kv.metrdən çox olan və oturum tutumu 50 nəfəri aşan ictimai iaşə obyektlərinin yaşayış binalarının altında yerləşməsi heç bir halda mümkün deyil. Bu kimi hallarla bağlı müvafiq qurumlar obyektin necə fəaliyyət göstərdiyini araşdırmalıdır”.

Ekspert qeyd edib ki, tələblər yalnız ictimai iaşə obyektlərinə deyil, digər fəaliyyət növlərinə də aiddir:

“Tikinti normalarına əsasən, bina altında yerləşən qeyri-yaşayış sahələri yaşayış hissəsindən tam ayrılmalıdır; obyekt binanın təxliyə imkanlarına mane olmamalı, giriş-çıxışı ayrıca təşkil edilməli, yanğın və havalandırma sistemləri düzgün qurulmalıdır.

Son günlər baş verən hadisələr tikinti normalarının ciddi şəkildə pozulduğunu göstərir. Yəqin ki, bununla bağlı araşdırma aparılır. İstintaq orqanları məsələnin mahiyyətini araşdırıb qərar verəcək.

Baş verənlər cəmiyyət üçün də mesaj olmalıdır. Növbəti mərhələdə bu sahədə fəaliyyət göstərən şəxslər, heç olmasa, mövcud qanunvericiliyin tələblərinə əməl etməlidirlər”.

Qeyd edək ki, 21 noyabrda Yasamal rayonu, Mirəli Seyidov küçəsində yerləşən çoxmərtəbəli yaşayış binasında baş verən yanğın nəticəsində 3 nəfər ölüb, 20-dən çox insan xəsarət alıb. Hadisəyə görə binanın zirzəmi qatı və birinci mərtəbəsində yerləşən qeyri-yaşayış obyektini icarəyə götürmüş "TAXES GROUP" MMC-nin (Loft Klinika) qanuni təmsilçisi - direktoru Bəhruz Paşayev həbs edilib.