13:00

Azərbaycan Respublikasının Minatəmizləmə Agentliyinin əməkdaşı dünyasını dəyişib.

Axar.az Unikal.az-a istinadən xəbər verir ki, 2004-cü il təvəllüdlü Orxan Məhərrəmov bir neçə gün komada qaldıqdan sonra vəfat edib.

O.Məhərrəmovun xaricdə təlimdə olarkən həyatını itirdiyi bildirilir.

***

Azərbaycan Respublikasının Minatəmizləmə Agentliyi (ANAMA) Kambocada vəfat edən əməkdaşı barədə məlumat yayıb.

ANAMA-dan verilən məlumata görə, keçirilən humanitar minatəmizləmə fəaliyyətinə dair beynəlxalq təlimlərdə iştirak edən agentliyin minaaxtaran it bələdçilərindən biri Orxan Məhərrəmov səhhətində yaranan kəskin problemlə əlaqədar cari ilin yanvarın 14-də həmin ölkədə xəstəxanaya yerləşdirilib.

O, yanvarın 18-də Malayziyadakı ixtisaslaşmış xəstəxanaya təxliyə edilib. Həkimlərin səylərinə baxmayaraq, əməkdaşın həyatını xilas etmək mümkün olmayıb və yanvarın 25-də vəfat edib.

Məsələ ilə bağlı bir neçə gün öncə Malayziyaya ezam olunan ANAMA əməkdaşları Orxan Məhərrəmovun nəşinin ölkəmizə gətirilməsi üçün Azərbaycanın Malayziyadakı səfirliyinin dəstəyi və sözügedən təlimlərin təşkilatçıları ilə koordinasiya etməklə müvafiq tədbirlər həyata keçirirlər.