Astara rayonunun Vaqo kəndində torpaq sürüşməsi baş verib.

Axar.az Teleqraf-a istinadla xəbər verir ki, Pensərçayın kənddən keçən hissəsində beton bəndlər dağılaraq torpaq qatı ilə birlikdə çaya tökülüb.

Nəticədə kənddaxili yolun bir hissəsi iki hissəyə bölünüb. Sakinlər bildirirlər ki, çayın suyu çox olsaydı, daha ciddi fəlakət yarana bilərdi.

Əraziyə aidiyyəti qurumların nümayəndələri cəlb olunub. Problemin qısa müddətdə həlli üçün çayın məcrası texnika vasitəsilə dəyişdirilir.

Astara Su Melorasiya Sistemləri İdarəsinin baş mühəndisi Fərid Yusifov bildirib ki, torpaq eroziyaya uğrayıb və nəticədə 1972-ci ildə tikilmiş 17 bust bənd çaya aşıb, digər 5 bəndə isə ciddi ziyan dəyib. İdarənin ekskavatoru ilə çay məcrasının istiqaməti dəyişdirilir, bəndlərin ətrafı təmizlənir.

Hazırda təhlükəsizlik məqsədilə ərazi lentlənib və nəqliyyat vasitələrinin keçidi ciddi nəzarət altındadır.