Qanuni oğrular Rövşən Lənkəranskinin varidatını bölməyə başlayıblar.

Axar.az xəbər verir ki, bu barədə informasiyanı "Rosbalt" agentliyi özünün etibarlı mənbələrinə istinadən yayıb. Agentlik Rövşən Canıyevin nəzarətində olan göyərti bazarının Merab Suxumskinin nəzarətinə keçdiyini bildirib:

"Canıyevin daha ciddi aktivləri son illər yaşadığı Türkiyədə olub. Buraya Rövşənin dəstəyi ilə fəaliyyət göstərən kommersantlar və firmalar, otellər və sairə aiddir. Artıq Canıyevin yaxın adamları qanuni oğru Hüseyn Əhmədov və Merab Suxumski arasında bölünüblər. Suxumskinin tərəfinə keçənlər arasında Temur Nemsitsveridze (Sripa), Roina Uqlavu (Mateviç), Dato Çuradzenin adları yer alır. Hər iki tərəf Rövşənin varidatına iddia edir. Hələlik Hüseynlə Merab arasında birbaşa kontlikt yoxdur, amma bütün proses ona doğru gedir. Görünür, sakit yolla Rövşənin mirasını bölmək alınmayacaq".

Qeyd edək ki, Rövşən Lənkəranski bu il avqustun 18-də İstanbulda qətlə yetirilib. Onun ölüm əmrinin kim tərəfindən verildiyi indiyə qədər istintaqa məlum deyil. Bəzi mətbuat orqanları isə Lənkəranskinin ölümündə bir müddət öncə həbs edilmiş rus mafiyasının lideri Zaxariya Kalaşovun maraqlı ola biləcəyini yazıb.