Sabah Azərbaycanda havanın temperaturu 5 dərəcəyədək enəcək, respublikanın bəzi ərazilərində qar yağacaq.

Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosuna istinadən verdiyi məlumata görə, sabah Bakıda və Abşeron yarımadasında havanın qeyri-sabit keçəcəyi, bəzi yerlərdə yağıntılı olacağı gözlənilir. Güclü şimal-qərb küləyi əsəcək.

Bakıda və Abşeron yarımadasında havanın temperaturunun gecə 3-5, gündüz 8-13 dərəcə isti olacağı ehtimalı var.

Sabah Azərbaycanın rayonlarında gecə və səhər bəzi yerlərdə hava dumanlı və çiskinli olacaq. Günün ikinci yarısından başlayaraq, bəzi yerlərdə havanın yağıntılı olacağı, dağlıq və dağətəyi rayonlarda sulu qar, qar yağacağı gözlənilir. Arabir güclü qərb küləyi əsəcək.

Aran rayonlarında temperaturun gecə 3-8, gündüz 13-18, dağlarda gecə 3 dərəcə şaxtadan 2 dərəcəyədək isti, gündüz 2-7 dərəcə isti olacağı gözlənilir.