SOCAR-ın "Neftqaztikinti" trestinin 173 nəfər əməkdaşı işdən azad edilir.

APA xəbər verir ki, bunu Neftçilər Hüquqlarının Müdafiəsi təşkilatının sədri Mirvari Qəhrəmanlı Feysbuk sosial şəbəkəsindəki hesabında bildirib.

Hüquq müdafiəçisi bildirib ki, işçilər müqavilə vaxtının bitməsi ilə əlaqədar tutduğu vəzifədən uzaqlaşdırılır.

Trestdə "Ernst&Young" audit şirkəti tərəfindən yoxlama aparılır. "Yoxlamaların nəticələrinə əsasən trestin əməkdaşları işdən azad olunur", - deyə mənbə bildirib.

Qeyd edək ki, trestin 3000-ə yaxın əməkdaşı var.

SOCAR-ın İnsan Resursları Departamentinin rəisi Asif Bəkirli isə məsələyə münasibətində bildirib: "Hal-hazırda həmin obyektlərdə işlər başa çatdığı üçün ilin sonunadək 98 nəfər müvəqqəti layihə müddətinə işə qəbul edilmiş işçilərin əmək müqaviləsinə xitam verilməsi nəzərdə tutulub ki, həmin işçilərdən 17 nəfərinin əmək müqaviləsinə xitam verilib. Eyni zamanda, bildiyiniz kimi, SOCAR-da işə qəbul prosesi şirkət daxili Standartlar və Qaydalarla tənzimlənir ki, bunlara əsasən də müvəqqəti işçilərin daimi işə keçirilməsi yalnız müsabiqə yolu ilə aparılır. Bu baxımdan da “Neftqaztikinti” tresti tərəfindən təqdim ediləcək tədricən yaranacaq bütün vakansiyalar İnsan Resursları Departamenti tərəfindən rəsmi internet saytına veriləcək. Həmin insanlar da bu müsabiqədə iştirak edə bilərlər. Onların bir üstünlüyü də odur ki, artıq iş təcrübələri və bacarıqları vardır".