Salyan rayonunda Kür çayının Çuxanlı kəndi ərazisindən keçən hissəsinin üzərində analoqu olmayan yeni körpü tikilir.

"Axar.az" xəbər verir ki, keçən ilin ortalarında istifadəyə veriləcəyi planlaşdırılan, lakin hələ də tikintisi davam edən körpü bir sıra özəllikləri və üstünlükləri ilə digər körpülərdən seçiləcək.

Ələt-Astara yolunun tikintisi ilə əlaqədar inşa edilən körpünün sifarişçisi "Azəryolservis" ASC-dir. Körpünün tikintisi 2011-ci ilin may ayından "Azərkörpü" ASC tərəfindən həyata keçirilir.

6 dayaqlı körpünün ümumi uzunluğu 362, eni isə 30 metr olmaqla 4 zolaqlı yoldan ibarət olacaq. 5 aşırımlı körpünün çayın üstünə düşən 150 metr hissəsi isə asmadır.

Artıq layihə çərçivəsində bütün dayaqlarla yanaşı 3 ədəd dairəvi, 1 ədəd düzbucaqlı boru, 1 ədəd heyvan keçidi və eni 9 metr, hündürlüyü 5 metr olan tunelin tikintisi başa çatdırılıb.

Körpünü fərqləndirən özəlliyi və üstünlüyü ondadır ki, 150 metr asma hissəsi dayaqsız olmaqla kanatlar vasitəsilə saxlanılacaq.

Dəmir-beton körpünün smeta-layihə dəyəri 35 milyon manatdır.