Bəzən alıcılar yeni telefon aldıqdan bir müddət sonra telefonun bloklanması halı ilə qarşılaşırlar. Bunun da səbəbi həmin telefonun kredit borcunun olmasıdır.

Bu sözləri Axar.az-a açıqlamasında Azad İstehlakçılar İctimai Birliyinin sədri Eyyub Hüseynov deyib. O bildirib ki, bu kimi hallarla rastlaşan istehlakçıların hüquqlarının pozulması son vaxtlar çox yayılmış məsələdir:

“Əvvəl kreditlə telefon alırlar, sonra pul lazım olduğu üçün həmin telefonu satırlar. Bəzən satıcılar işlənmiş telefonları təzə telefon adı ilə satırlar. Bu hallarla rastlaşan istehlakçı dövlət orqanları qarşısında məsələ qaldırarsa, satışı həyata keçirən tərəfi 1500 manat cərimə gözləyir. Onu da qeyd edim ki, son 6 ayda bizə daxil olan belə şikayətlərin sayında artım müşahidə olunub. Elə hallar olur ki, bu problem tərəflər arasında danışıq yolu ilə həll olunur. Bəzən isə tərəflər razılığa gələ bilmirlər. Bunun qarşısını almaq üçün ciddi işlər görülməlidir”.

Qeyd edək ki, son vaxtlar alıcılara yeni telefon adı ilə işlənmiş və kreditdə olan telefonlar satılır. Telefonun bankda girov olub-olmadığını yoxlayan bir sistem mövcud deyil, buna görə də alıcı məlumatsız qalır. Bir müddət sonra telefon bloklandığı zaman alıcı aldadıldığını başa düşür.