"Biz dil məsələsini inzibati müstəvidə həll eləsək, bu, dilə qarşı hörmətsizlik olar".

Bu sözləri Axar.az-a AMEA-nın Dilçilik İnstitutunun nümayəndəsi Şahlar Göytürk mediada dil normalarının qorunub saxlanılması ilə bağlı məsələni şərh edərkən söyləyib. Akademik Tofiq Hacıyevin gəlişindən sonra Dilçilik İnstitutunda köklü dəyişikliyin baş verdiyini deyən Şahlar Göytürk mətbuat və televiziya ilə bağlı yeni işlərə start verildiyini də qeyd edib:

"İşin strukturunda, məzmununda, görüləsi işlərin ictimailləşdirilməsində, mətbuata açıq olmasında və digər məsələlərdə şəffaf işlər görülüb. Bunlardan biri də yeni açılmış şöbələrin plan işləri ilə bağlıdır. Professor Qulu Məhərrəmlinin rəhbərlik etdiyi monitorinq şöbəsi "Dövlət Proqramı"nda əksini tapan müddəalarla bağlı xeyli işlər görüb. Mətbuatın, televiziyanın, reklamların və s. dili ilə bağlı ciddi işlər görülməkdədir."

Dilçi alim həllini tapmamış normalarla bağlı hələlik Çevik Media Komissiyasının yaradıldığını bildirib:

"Bu yaxınlarda sayt rəhbərləri ilə görüşdə dilimizin qorunması, inkişafı, dilin tətbiqi işinin yaxşılaşdırılması ilə bağlı çox ciddi məsələlər müzakirə olundu. Hələlik həllini tapmamış bəzi məsələlərlə bağlı tanınmış mütəxəssislərdən ibarət Çevik Media Komissiyasının yaradılması qərara alınıb".

Şahlar Göytürk dillə bağlı məsələnin inzibati müstəvidə həll edilməsinin doğru olmadığını vurğulayıb:

"Bu məsələdə əsas dil sevgisidir. Əgər dil sevgisi yoxdursa, burada "cəzalar"ın heç bir əhəmiyyəti ola bilməz. Dil məsələsini inzibati müstəvidə həll etmək dilimizə qarşı hörmətsizlik olardı. Hesab edirəm ki, bu məsələdə ictimai qınaq və dil sevgisi olmalıdır. Dildə kifayət qədər narahatedici problemlər var. Artıq həyəcan təbili çalınmalıdır. Axı son 20 ildə bizim mətbuatımız inkişaf edib. Təəssüf ki, bəzi xəbər başlıqlarına baxanda, dil qüsurlarını görəndə adam dəhşətə gəlir. Kim necə istəyir, xəbəri o formada da təqdim edir. Dialekt leksikasının, məişət üslubunun çap və elektron mətbuatın dilinə - publisistik üsluba çox asanlıqla daxil olması da narahatlıq yaradan məsələlərdəndir. Bu gün mətbuatın dilində mövcud olan həmin yanlış tendensiyaların qarşısını almaq xeyli çətinləşib. Görünür, müəyyən qədər xəbərdaredici, bir qədər də inzibati resurslardan istifadə olunmalıdır. Jurnalistikaya gələnlərin əksəriyyəti qeyri-peşəkardır. Dövlət səviyyəsində ana dilimizə qayğı olsa da, cəmiyyətimizdə dilə münasibət istənilən səviyyədə deyil. Dil təkcə Dilçilik İnstitutunun problemi deyil, bütöv cəmiyyətin, millətin problemidir. Düşünürəm ki, Dilçilik İnstitutunda fəaliyyət göstərən bəzi şöbələrin iş prinsipinə yenidən baxılarsa, daha səmərəli ola bilər".