Bu il dövlət universitetlərində jurnalistika fakültəsinə cəmi 42 tələbə qəbul olunub.

Axar.az-a verilən məlumata görə, qabiliyyət imtahanı verən abituriyentlərin yalnız 42-si bu sınaqdan keçə bilib.

Xəbərdə deyilir ki, ilk dəfə qabiliyyət imtahanı tətbiq olunub və bu yaradıcı ixtisas üzrə təhsil almaq istəyənlərin əksəriyyəti ürəkaçan nəticə göstərməyib.

Qeyd edək ki, jurnalistika ixtisasına qəbul olmaq üçün cəmi 569 abituriyent qeydiyyatdan keçib. Abituriyentlər bakalavr səviyyəsinə qəbul imtahanının qabiliyyət imtahanı mərhələsində təqdim olunmuş mövzu üzrə inşa (esse) yazıblar. Yazı işi abituriyentin imtahan verdiyi bölmədən asılı olaraq Azərbaycan və ya rus dilində yerinə yetirilib.

İnşa (esse) abituriyentin təklif olunmuş mövzu üzrə öz nöqteyi-nəzərini əsaslandırılmış surətdə ifadə etdiyi müstəqil yaradıcı yazı işidir. Abituriyentlərə ictimai-siyasi, iqtisadi, mədəni həyat sahələrinə aid, həmçinin respublikamız, görkəmli şəxsiyyətlərimiz, təhsil, ixtisas seçimi, ətraf mühit, mənəviyyat və bütün bəşəriyyəti narahat edən digər qlobal problemlər haqqında müstəqil mühakimə yürütmək və əsaslandırmaq bacarığını nümayiş etdirməyə imkan verən sərbəst mövzular təklif olunub.

İnşa yazıda (essedə) abituriyent öz fikirlərini aydın və savadlı ifadə etməlidir. İnşa (esse) səliqəli, oxunaqlı və aydın xətlə yazılmalıdır. Qiymət həm yazılan inşanın məzmununu, həm də yazı savadını nəzərə almaqla verilib.