"Yaranmış problem böyük maliyyə dəyəri olan genişzolaqlı internet layihəsi ilə bağlıdır".

Bu sözləri Axar.az-a Rabitə və Yüksək Texnologiyalar Nazirliyi İctimaiyyətlə Əlaqələr şöbəsinin müdiri Müşviq Əmirov son vaxtlar internetdə xüsusilə küləkli və yağışlı hava zamanı yaranan problemlər barədə danışarkən dedi.

Onun sözlərinə görə, problemlər yeni layihənin icrasından sonra aradan qalxacaq:

"Yaranmış problem böyük maliyyə dəyəri olan genişzolaqlı internet layihəsi ilə bağlıdır. Yeni layihə internetin kəmiyyət və keyfiyyət baxımından daha yüksək şəkildə istifadəsinə imkan yaradacaq. Artıq layihə reallaşmaq üzrədir. İşlərin icrasına başlanılacaq".

Nazirlik rəsmisinin verdiyi məlumata görə, sözügedən layihənin dəyəri 400 milyon dollardır:

"İşlərə qısa zamanda başlanacaq. Nəticə etibarı ilə genişzolaqlı internet ölkənin bütün kənd və qəsəbələri də daxil olmaqla hər bir yaşayış məntəqəsini əhatə edəcək. Layihənin dəyəri təxminən 400 milyon dollar civarındadır".

Təklif olunan internetin qiymətinin dəfələrlə aşağı salındığını deyən qurum rəsmisi bundan sonra da qiymətlərin endiriləcəyini qeyd edib: "Son zamanlarda internetin qiyməti 4-5 dəfə aşağı salınıb. Bu proses gələcəkdə də davam edəcək".