Ana səhifə Toplum |
İctimai nəqliyyatda kart sisteminə keçid ilin sonuna tam yekunlaşacaq. Artıq yanvarın 1-dən avtobuslarda qəpiklər işləməyəcək.
Axar.az Nəqliyyat Nazirliyinə istinad edərək xəbər verir ki, Avropa Olimpiya oyunlarının Bakıda keçirilməsi ilə əlaqədar bir sıra tədbirlərlə yanaşı bütün nəqliyyat vasitələrində ödəniş kartlarının tətbiqi başa çatdırılacaq.
Qeyd edək ki, ölkəmizdə ictimai nəqliyyatda ilk kartlı keçidi Bakı Metropoliteni tətbiq edib. Artıq neçə ildir metroda nəğd ödəniş tamamilə ləğv edilib və insanlar kartla ödənişə öyrəniblər. Lakin hər nəqliyyat vasitəsi üçün ayrı-ayrı kartların tətbiqi vətəndaşlarda narahatlıq yaratdığından ictimai nəqliyyatda vahid kart sisteminin yaradılmasını təklif edirlər.
Bu məsələ 2 il əvvəl dövlət qurumları arasında müzakirə edilsə də, nəticəsiz qalmışdı. Daha doğrusu, Metropolitenin keçmiş rəisi Tağı Əhmədov buna razı olmamışdı. Bəs hazırda vəziyyət necədir?
Bakı Metropoliteninin mətbuat xidmətinin rəhbəri Nəsimi Paşayev saytımıza açıqlamasında vahid kartın işə düşməsi üçün danışıqların davam etdirildiyini bildirb:
"Təbii ki, ümumi ictimai nəqliyyatda vahid kart sisteminə keçilməsi bizim də istəyimizdir. Artıq bununla bağlı danışıqlar gedir. İstər tərəfdaş şirkətlər, istərsə də müvafiq dövlət qurumları ilə danışıqlar davam edir. Düşünürük ki, buna nail ola biləcəyik".
Xatırladaq ki, hazırda bir çox xarici ölkələrdə, o cümlədən, Böyük Britaniyada nəqliyyatda vahid kartdan istifadə edilir.
Tarix
2014.10.02 / 15:41
|
Müəllif
Fərqanə Vəkilova
|