Bakı Dövlət Universitetinin Rus ədəbiyyatı tarixi kafedrasının müdiri, filologiya üzrə elmlər doktoru, professor Aqil Cəfər Xəndan oğlu Hacıyev rəhmətə gedib.

Bakı Dövlət Universitetindən Axar.az-a verilən məlumata görə, Aqil Hacıyev 10 avqust 1947-ci ildə anadan olub. 1965-1970-ci illərdə BDU-nun Filologiya fakültəsində təhsil alıb.

1973-cü ildə M.V.Lomonosov adına Moskva Dövlət Universitetinin aspiranturasını bitirib və həmin il namizədlik dissertasiyasını müdafiə edib. Həmin ildən BDU-nun Rus ədəbiyyatı tarixi kafedrasında müəllimlik fəaliyyətinə başlayıb və kafedrada müəllim, baş müəllim, dosent vəzifələrində çalışıb.

1982-ci ildə doktorluq dissertasiyası müdafiə edib. Filologiya fakültəsinin dekanı (1990-1992) vəzifəsində işləyib.

1987-ci ildən Yazıçılar Birliyinin üzvü, 1993-cü ildə Ankaradakı Türk Folklor Qurumunun fəxri üzvü, 2003-cü ildə Tiflis Beynəlxalq Sosial-iqtisadi Akademiyasının həqiqi üzvü və Sankt-Peterburq Pyotr Elm və İncəsənət Akademiyasının müxbir üzvü seçilib. 2009-cu ildə “Şöhrət” ordeni ilə təltif edilib.

Müxtəlif illərdə Ali Attestasiya Komissiyasının eksperti, AAK-da Humanitar və ictimai şöbənin müdiri, Tələbə Qəbulu üzrə Dövlət Komissiyasında Ekspert Şurasının sədri olub.

Allah rəhmət eləsin!