Yol hərəkəti qaydalarını pozan sürücüləri polis adətən səsgücləndirici vasitəsilə həmin avtomobilin nömrəsini elan etməklə saxlayırdı. Ancaq son vaxtlar polislərin səsgücləndirici alət olan rupordan istifadə etmədiyi görünür. Yol Patrul Xidmətinin əməkdaşları qayda pozan sürücüləri indi adətən xüsusi siqnal və sayrışan işıqlar vasitəsilə saxlamağa üstünlük verirlər.

Məsələ ilə bağlı Axar.az-a açıqlama verən yol-nəqliyyat eksperti Elməddin Muradlı bildirib ki, Yol Patrul Xidmətinin siravi əməkdaşlarına patrul avtomobillərində rupordan istifadə etməyə bir müddətdir icazə verilmir:

“Hazırda yalnız komandir və rəis heyətinin maşınlarında rupor var və istifadəsinə də icazə verilir. Bununla bağlı müxtəlif fikirlər söylənilir. Ruporun istifadəsi ilə bağlı hər hansısa qadağa yoxdur. Sadəcə istifadəsi bir qədər məhdudlaşdırılıb.

Ancaq “Yol Patrul Xidməti haqqında” təlimatda da, eləcə də “Yol Hərəkəti Haqqında” qanunda hansı nəqliyyat vasitəsinin nə zaman, hansı formada dayandırılması məsələsi öz əksini tapıb. Qanunda göstərilib ki, YPX əməkdaşı qaydanı pozan sürücünü patrul avtomobilindəki ruporla, sayrışan işıqla və siqnal vasitəsilə saxlatdıra bilər.

Əgər YPX avtomobilində səsgücləndirici alət yoxdursa, bu zaman polis qayda pozan sürücünü xüsusi siqnal və işıqlar vasitəsilə saxlayır. Düzdür, bu, bəzən sürücüləri çaşdırır. Yəni yolda hərəkətdə olan sürücülər çox vaxt polisin bu işarəni kimə verdiyini dəqiqləşdirə bilmir. Ancaq istənilən halda polis maşını həmin avtomobilə yaxınlaşaraq özü də işarə edir ki, kənara verib saxlasın”.

Ekspert bildirib ki, bütün yol patrul polisləri rupordan istifadə etsələr, daha yaxşı olar:

“Bu, yolda hərəkətdə olan sürücülərin ani də olsa diqqətinin yayınmaması üçün önəmlidir. Çünki rupor olduqda polis birbaşa qayda pozan sürücünün nömrəsini deyir və həmin sürücü maşını saxlayır. Bu, digər avtomobillərə maneçilik törətmir və sürücülərin diqqətinin dağılmasına səbəb olmur”.

E.Muradlı qeyd edib ki, polislər səsgücləndiricidən istifadə etmədiyi üçün bəzən qayda pozan sürücü polisin onu saxlatmaq istədiyini başa düşməyərək, “saxla” əmrinə tabe olmur və uzaqlaşır. Bu da sürücünün əlavə olaraq cərimələnməsinə səbəb olur:

“Polisə tabe olmamağın cəriməsi 80 manatdır. Əgər avtomobildə rupor qurğusu varsa, istifadə edilməlidir. Ancaq təbii ki, müəyyən qaydalar gözlənilmək şərti ilə. Yəni gecə saatlarında, yaşayış evlərinin yaxınlığında, binaların həyətində hansısa sürücüyə “saxla” işarəsinin verilməsi kimi hallarda bu qurğunun istifadəsinə icazə verilməsin. Görünür, bu cür hallar baş verdiyi üçün qurğunun istifadəsi məhdudlaşdırılıb”.