Tiflis Şəhər Məhkəməsi Gürcüstan Baş prokurorunun ərizəsi əsasında keçmiş baş nazir Zurab Jvaniyanın mühafizəçisi olan Mixail Dzadzamiyanın 2 min lari qarşılığında həbsdən girovluğa buraxılması haqqında qərar qəbul edib.

Axar.az xəbər verir ki, prokurorluq bu addımın Gürcüstan Cinayət Prosesual Məcəlləsinə uyğun olaraq atıldığını bildirib.

Zurab Jvaniyanın ölümündə günahkar hesab edilən mühafizəçilər Mixail Dzadzamiya və Koba Xarşiladze özlərinin hüquqi haqlarından bəhrələniblər və andlılar məhkəməsinə müraciət ediblər. Bundan sonra isə andlıların seçilməsində problem yaranıb. 17 sentyabrda işin məhkəməyə göndərilməsindən üç ay keçməsinə baxmayaraq, hələ 13 andlıdan yalnız biri seçilib. Buna görə də məhkumun 9 aylıq gözaltına alınması müddəti bitib və Dzadzamiya pul qarşılığında azadlığa çıxıb. Lakin andlılar seçildikdən sonra proses davam etdiriləcək.

Dzadzamiya öz səlahiyyətlərindən düzgün və doğru istifadə etməməkdə günahlandırılır.

Xatırladaq ki, Zurab Jvaniya Kvemo Kartli qubernatorunun müavini azərbaycanlı Raul Yusifovla birlikdə 3 fevral 2005-ci ildə Tiflisin Saburtalinski küçəsində yerləşən mənzildə dəm qazında zəhərlənərək həlak olmuşdular. Rəsmi Tiflis hələ də onların ölümünün tam səbəbinin nə olduğunun aydınlaşdırılmadığını bildirib.

Bəzi mənbələr hər iki siyasətçinin öldürüldüyünü qeyd etmişdilər. Yusifovun ölümündən bir müddət sonra atası Yaşar Yusifov açıqlama verərək, Tiflisin rəsmi mövqeyini təkzib etmiş və oğlunun Saburtalinski küçəsində heç vaxt mənzilinin olmadığını vurğulamışdı. Jvaniyanın qardaşı isə mənzildə ölən hər iki şəxsin əl izlərinin aşkarlanmadığını qeyd etmişdi. Bu məqam onların başqa yerdə öldürüldükdən sonra bu mənzilə gətirilməsi versiyasını meydana çıxarırdı.

Sonrakı günlərdə müxtəlif gürcü siyasətçilər Jvaniyanın öldürüldüyünü və ölümdə Saakaşvilinin günahkar olduğunu söyləmişdilər.