Xətai rayonunda yerləşən NZS qəsəbəsi adının qəribəliyi ilə diqqət çəkir.

Xətai Rayon İcra Hakimiyyətindən Axar.az-ın sorğusuna cavabda isə bu qəsəbənin daha rüsvayçı - UPD (Upravleniye Promıslovıx Doroq) ad ilə rəsmi sənədlərdə adı keçdiyi üzə çıxdı.

Bu qəsəbəyə niyə illərdir ad verilmir? Bu barədə Milli Məclisə müraciət edilibmi?

Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov saytımıza açıqlamasında deyib ki, Ağ Şəhər layihəsi çərçivəsində sözügedən ərazilərdəki bəzi qəsəbələrin adı dəyişdiriləcək:

“Xətai rayonu ərazində NZS qəsəbəsi də var. Lakin bu, rəsmi ad deyil. Çünki rəsmi sənədlərdə bu qəsəbə UPD adlanır. Həmin qəsəbədə əvvəllər hansısa idarə fəaliyyət göstərdiyi üçün adı UPD olub. Bu ad sovet dövründən qalıb. Hazırda təkliflər hazırlanır. Hissə-hissə bəzi küçələrin adları dəyişdirilir. Həmin ərazidə isə Ağ Şəhər salınır. Bu layihə çərçivəsində mərhələli şəkildə işlər görülür. UPD qəsəbəsinin də abadlıq-quruculuq işləri çərçivəsində adının dəyişdirilməsi nəzərdə tutulub”.