Güney Azərbaycanın Urmiya şəhərinin İran parlamentindəki millət vəkili Nadir Qazipur Urmu gölünə ayrılan valyuta vəsaiti hesabına İran rəsmilərinin Amerika Birləşmiş Ştatlarına səfər etdiyini bildirib.

Axar.az xəbər verir ki, deputat bu barədə İran mediasına danışıb.

“Xoşbəxtlikdən Urmu gölündə suyun səviyyəsi ötən ilə nisbətən 1.02 metr artıb. Bütün bunlar Allahın mərhəmətidir. Lakin təəssüf ki, Urmu gölünə hədiyyə edilən valyuta vəsaiti bizim əlimizə çatmayıb. Ona görə də cənab Cahangiri Urmu Gölünü Canlandırma Mərkəzinin rəisi kimi cavabdeh olmalı, bəzi ölkələrin Mərkəzə göndərdiyi valyuta vəsaitinin bu günədək harada xərcləndiyi barədə bizə məlumat verməlidir", - o bildirib.

Millət vəkili sözlərinin davamında vurğulayıb:

“Bizdə olan məlumata görə, Urmu gölünün canlandırılması üçün 300 milyon dollardan çox yardım edilib. Bu vəsaitin hesabına 7 nəfər Amerika Birləşmiş Ştatlarına səfər edib. Bu barədə Urmu Gölünü Canlandırma Mərkəzinə heç bir raport təqdim olunmayıb".