Azərbaycan Prezidenti sonuncu iqtisadi müşavirədə xüsusi vurğuladı ki, büdcədə xərclər məqsədyönlü şəkildə şişirdilir. Biz prezidentə dəstək verməliyik. Şişirdilən xərclərin qarşısını almalıyıq.

Axar.az xəbər verir ki, bu sözləri BAXCP sədri, deputat Qüdrət Həsənquliyev Milli Məclisdə “Büdcə sistemi haqqında” qanuna dəyişiklik edilməsi haqda məsələnin müzakirəsi zamanı deyib.

Deputatın sözlərinə görə, qanunun 12-ci maddəsinə əsasən hansı sənədlərin Milli Məclisə təqdim edilməsi göstərilib:

“Orada açıq qeyd edilir ki, mühüm investisiya proqramlarını özündə əks etdirən dövlət investisiya layihələri də təqdim edilməlidir. Amma bizə ümumi məlumatlar verilir, konkret olaraq hansı obyektə nə qədər vəsaitin ayrılacağını bilmirik. Mən Milli Məclis rəhbərliyindən xahiş edirəm ki, büdcə layihəsi sənədi parlamentə daxil olarkən bütün sənədlər təqdim edilməsə, onu qəbul etməsin.

Eləcə də Hesablama Palatasına deyilməlidir ki, investisiya layihələrini dəqiq göstərin, bilinsin ki, hansı obyekt neçəyə başa gəlir. Hesab edirəm ki, bu cür fəaliyyətlə Prezidentə dəstək və kömək edə bilərik”.