Bu gün Milli Məclisdə “Uşaqların cinsi istismardan və cinsi zorakılıqdan müdafiəsi haqqında” Avropa Şurası Konvensiyasının təsdiq edilməsi barədə qanun layihəsinin müzakirəsi zamanı millət vəkili Qənirə Paşayeva da çıxış edib.

Axar.az xəbər verir ki, millət vəkili bu konvensiyaya qoşulmağımızın, bununla bağlı qanunun qəbul olunmasının vacibliyini bildirib.

Q.Paşayeva hökumət və parlamenti digər vacib bir konvensiyanı - qadınlara qarşı zorakılığın və məişət zorakılığının qarşısının alınması və ona qarşı mübarizə haqqında Avropa Şurası Konvensiyasını (İstanbul Konvensiyasını) da imzalamağa və ratifikasiya etməyə çağırıb:

“Qadınlara qarşı zorakılığın və məişət zorakılığının qarşısının alınması istiqamətində ölkəmizin Birinci vitse-prezidenti Mehriban xanım Əliyevanın millət vəkili kimi fəaliyyət göstərdiyi dövrdə qanunvericilik sahəsində önəmli addımlar atılıb. Ölkəmizin İstanbul Konvensiyasını imzalaması və ratifikasiya etməsi dövlətimizin beynəlxalq imici üçün də vacib bir məsələdir, amma ən əsası, bu, ilk növbədə bizim insanlarımız –zorakılıq, həmçinin məişət zorakılığının qurbanı olan qadınlarımızın hüquqlarının daha yaxşı qoruna bilməsi üçün lazımdır”.

Q.Paşayeva bildirib ki, qadınlara qarşı zorakılığın artması hamımızı ciddi narahat etməlidir və dünyanın inkişaf etmiş ölkələrində olduğu kimi, bu cür ciddi narahatlıq doğuran problemlə mübarizə istiqamətində fəaliyyətimizi daha da gücləndirməliyik:

“Ona görə də mən qısa zamanda bu konvensiyanın da imzalanıb, ratifikasiya edilməsinə və ümumiyyətlə, qadınlara qarşı zorakılıq, məişət zorakılığı ilə daha fəal və sərt mübarizəyə çağırıram”.