Rayonlarda fəaliyyət göstərən icra qurumlarının rəsmi saytları icra başçıları barədə məlumat verməkdə gecikir.

Axar.az qısa araşdırma apararaq maraqlı məlumat əldə edib.

Alimpaşa Məmmədov ötən ilin oktyabrında Şəmkir Rayon İcra Hakimiyyətinin başçısı təyin olunsa da, qurumun rəsmi saytında bu barədə məlumat verilmir. Təyinatdan 5 aya yaxın bir vaxt keçməyinə baxmayaraq, başçı "gizli" saxlanılır.

Yanvarın 27-də prezidentin sərəncamı ilə Mübariz Ağayev Quba rayon İH başçısı vəzifəsindən azad edilərək Göyçay rayon İH-nin başçısı vəzifəsinə təyin olunub. Başqalarından fərqli olaraq o, Göyçaya gələr-gəlməz özünü tanıtdırıb, qurumun saytında məlumat verilib. Lakin Quba rayon İH-nin saytında yeni başçı - Yaşar Məmmədov haqqında məlumat vermək əvəzinə hələ də keçmiş başçının məlumatları yer alır.

Ucarda isə vəziyyət bir qədər normaldır. Rayon İH-nin rəsmi saytında Mənsur Məmmədovun başçı təyin edilməsi ilə bağlı prezidentin sərəncamı yerləşdirilib.