Sağlamlıq imkanları məhdud olduğundan xüsusi təhsilə cəlb olunan uşaqlar arasında ayrıseçkilik aradan qaldırılacaq. Ölkə başçısı "Sağlamlıq imkanları məhdud şəxslərin təhsili (xüsusi təhsil) haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının Qanununun tətbiqi haqqında sərəncama imza atmaqla bu problemə nöqtə qoyub.

Valideynlərin müraciəti əsasında problemi ilk olaraq məhz Axar.az işıqlandırıb. Təhsil Nazirliyindən aldığımız məlumata əsasən, hazırda xüsusi təhsilə cəlb edilən şagirdlərin sayı 6 min 127 nəfərdir. Evdə təhsil alanların sayı isə 920 nəfərdir. 2013-2014-cü dərs ilində bu rəqəm 1008 nəfər olub. Onlara cəmi 2 yerdə təhsil məktəbi xidmət göstərir. Həmin təhsil müəssisələrində 326 müəllim çalışır.

Nazirlər Kabinetinin "Xüsusi təhsilə cəlb olunanların valideynlərinə və ya digər qanuni nümayəndələrinə uşaqlarını xüsusi təhsil müəssisəsinə, sağlamlıq və reabilitasiya mərkəzlərinə və tibb müəssisələrinə aparıb-gətirmək üçün müavinətin həcminin müəyyən edilməsi haqqında" qərarı ilə həmin uşaqların valideynlərin 20 manat yolpulu verilib. 2013-cü ilin avqustundan evdə təhsil alan uşaqların həmin pulu dayandırılıb.

Bunun səbəbi qanunvericilikdə evdə təhsil alanların nəzərdə tutulmadığı göstərilib. Valideynlərin narazılıqları qanuna dəyişikliklə nəticələnib. Prezident İlham Əliyevin imzaladığı sərəncamla "Sağlamlıq imkanları məhdud şəxslərin təhsili (xüsusi təhsili) haqqında" qanuna edilən dəyişiklik qüvvəyə minib.

Dəyişiklikdə evdə təhsilə cəlb olunanların valideynlərinə və ya digər qanuni nümayəndələrinə uşaqlarını sağlamlıq və reabilitasiya mərkəzlərinə və tibb müəssisələrinə aparıb gətirmək üçün bu qanunun 26.3-cü maddəsində nəzərdə tutulmuş həcmdə vəsait ayrılması nəzərdə tutulub.

Milli Məclisin sosial siyasət komitəsinin sədri Hadı Rəcəbli Axar.az-a açıqlamasında bunu dövlətin həmin ailələrə dəstəyi kimi dəyərləndirib:

"Bu pulun həcmi o qədər də böyük deyil. Çünki müavinət və ya pensiya deyil ki, onların yaşayışını yaxşılaşdırsın. Bu, evdə təhsil alan uşaqların ancaq yolpulu kimi istifadəsi üçün nəzərdə tutulub. Hesab edirəm ki, bununla ölkə başçısı bu uşaqlara diqqətini bir daha göstərdi".

Yeri gəlmişkən, sağlamlıq imkanları məhdud şəxslərin valideynlərinə və ya digər qanuni nümayəndələrinə 20 manat məbləğində yolpulu verilir. H.Rəcəbli bundan sonra da həmin məbləğin 20-30 manat həcmində nəzərdə tutulduğunu deyib.

Prezidentin tapşırığına əsasən, Nazirlər Kabineti sözügedən qanuna dəyişiklik edilməsi ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etməlidir. Bu müddətdə HK-nın digər hüquqi aktları da həmin qanuna uyğunlaşdırılmalıdır.