Ana səhifə Toplum |
Azərbaycan Beynəlxalq Bankının sabiq sədri Cahangir Hacıyevin həyat yoldaşı Zamirə Hacıyeva bu gün London məhkəməsində mülklərinin mənbəyi ilə bağlı açıqlama verməsə, 100 milyon manatdan artıq dəyərləndirilən mal-mülk İngiltərə dövlətinin ixtiyarına keçəcək.
Axar.az “Yeni Müsavat”a istinadən xəbər verir ki, bu gün London məhkəməsində Zamirə Hacıyeva açıqlama verməlidir. Vəkilləri ötən ilin dekabrında Britaniya Milli Cinayət Agentliyinin onun mülkünü müsadirə etməsi cəhdinə qarşı apellyasiya şikayəti vermişdi. Lakin 2020-ci il fevralın 5-də onun şikayəti rədd edilib.
Apellyasiya Məhkəməsinin üç hakimindən biri Lord Burnett deyib ki, Zamirə Hacıyevanın bu qərardan şikayət etmək üçün icazə almaq barədə vəsatəti də rədd edilib. Bu o deməkdir ki, o, qərardan İngiltərə Ali Məhkəməsinə şikayət edə bilməyəcək.
Hakimlər onun 2 il əvvəl “İzahedilməz Sərvət Sərəncamı”nın qanuni hədəfi olduğunu bildirib. Zamirə Hacıyeva gəlirinin qanuni mənbəyini açıqlaya bilməsə, Milli Cinayət Agentliyi (NCA) mülkü və qolf kursunu müsadirə etmək üçün məhkəməyə müraciət edəcək.
Zamirə Hacıyeva mal-mülkün alınmasına xərclənən pulun mənbəyini göstərərsə, Milli Cinayət Agentliyi həmin sənədləri 60 gün ərzində öyrənərək əmlakın mənimsənilməsi, yaxud geri qaytarılması barədə yekun qərar verəcək.
Hüquqşünaslar bildirir ki, bu pullar Azərbaycan büdcəsindən oğurlanaraq Londona ötürülüb. Bu gün Zamirə Hacıyevanın ixtiyarında olan, dəyəri onmilyonlarla ölçülən varidat faktiki olaraq Azərbaycan dövləti, Azərbaycan xalqının vəsaitidir. Azərbaycan dövləti gələcəkdə sübut etsə ki, əmlaklar ona məxsusdur, həmin əmlakların qarşılığını ala bilər.
Tarix
2020.02.12 / 09:31
|
Müəllif
Nigar İxtiyarqızı
|