"Azəriqaz" İstehsalat Birliyində yeni "Çağrı Mərkəzi" xidməti yaradılıb.

ARDNŞ-dən Axar.az-a verilən məlumata görə, istehlakçılara göstərilən xidmətin keyfiyyətinin yüksəldilməsi, neqativ halların qarşısının alınması, şəffaflığın təmin olunması, xidmətə nəzarətin gücləndirilməsi və yaranmış problemlərin dərhal aradan qaldırılması məqsədi ilə "qaynar xətt" xidməti təkmilləşdirilərək, müştəri xidməti şöbəsinin tərkibində yeni "Çağrı Mərkəzi" xidməti yaradılıb.

Belə ki, abonentlər bundan sonra "104" və "185" nömrəli "qaynar xətt"lərə zəng vuraraq səsli menyünün köməyi ilə müvafiq düymələrdən birini seçməklə öz müraciətlərini ünvanlaya biləcəklər.

Sistemin köməkliyi ilə daxil olan zənglər avtomatik qaydada qeydiyyata alınacaq və yerli qaz istismar sahələrinə elektron formada göndəriləcək. Bu isə daxil olan şikayət və ya təkliflərin dərhal araşdırılaraq həll edilməsinə müsbət təsir göstərəcək. Eyni zamanda, daxil olan bütün müraciətlər arxivləşdiriləcək.

Hazırda xidmət qismən fəaliyyət göstərir. Yaxın vaxtlarda isə tam istifadəyə veriləcək.