Xəstə olduğunuzu bildiyiniz halda bunu gizlətməyin.

Axar.az xəbər verir ki, bu sözləri Bütün Qafqazın Şeyxi Allahşükür Paşazadə Real TV-nin “Mir Şahin vaxtı” verilişinə müsahibəsində deyib.

Şeyx deyib ki, insanlarımız qadağalara riayət etməlidir:

“Xəstə olduğunu bilir və ya digər insanlara yoluxduracağını bilə-bilə çölə çıxırsa, böyük günah işləmiş olur. Quranda yazıldığı və peyğəmbərimizin də buyurduğu kimi, bir insanı öldürən bütün insanları öldürmüş kimi günah qazanır. Bu mənada bir insan təkcə özünü deyil, digər insanları da düşünməlidir. Əgər bir insan bu virusa yoluxduğunu bilmirsə, onun heç bir günahı yoxdur. Lakin bilə-bilə bu əməli edirsə, artıq bu insan həm günahkardır, həm də böyük günah qazanmış olur”.

Şeyx peyğəmbərin bəzi hədislərinə diqqət çəkib:

“Peyğəmbərin bəzi hədisləri var ki, mən gənc olarkən bunlara bir məna vermirdim. Lakin bu gün başa düşürəm ki, əslində bu hədislər nə məna daşıyır. Məsələn, “xəstələrin yanına getməyin”. Bir digər hədisdə isə buyurub ki, bir yerdə ki, yoluxucu xəstəlik var, o yerə getməyin, o yerdəsinizsə, o yeri tərk etməyin. Bu gün bu hədisləri bir daha oxuyanda başa düşürəm ki, bu hədislər sanki bu gün üçün məsləhət xarakterlidir”.