Azərbaycan Dil Qurumunun geniştərkibli konfransı başlayıb.

Axar.az xəbər verir ki, bu gün keçirilən konfransda Azərbaycan Dil Qurumu İdarə Heyətinin üzvləri, yazarlar, dilçilər və ictimaiyyət nümayəndələri iştirak ediblər.

Konfransı giriş sözü ilə açan ADQ rəhbəri, millət vəkili Sabir Rüstəmxanlı qurumla bağlı məlumat verib.

Dilçilik haqqında danışan S.Rüstəmxanlı çıxışında sovet dövründə ana dili ilə bağlı apardıqları müzakirədən, dilimizi ədəbiyyatda yaşatmaları və sair bu kimi məsələlərdən danışıb:

"Azərbaycan müstəqillik qazandıqdan və ana dilinin dövlət səviyyəsində himayəsindən sonra Azərbaycan başqa və həm də daha ciddi təhdidlərlə üz-üzədir. Unutmaq lazım deyil ki, dil milli siyasətin ən vacib atributudur. Bu siyasət millətin yaşamasını və təhlükəsizliyini təmin edir".

Konfransda əsasən iki əsasə məsələ müzkirə olunub. Müzakirəyə çıxarılan məsələlərdən biri ADQ-nin hesabatı, digər məsələ isə ADQ-nin elmi ictimai şurasının seçilməsi ilə bağlı olub.

Azərbaycan Dil Qurumunun icraçı direktoru Anar Niftəliyev çıxışı zamanı 2006-cı ildən indiyə qədər ADQ-nin fəaliyyəti, monitorinqləri, təbliğatı, "Adq.az" saytının yaranması və bu kimi məsələlər barədə məlumat verib. O, qeyd edib ki, hazırda Dilçilik İnstitutu və terminologiya komissiyası işləmir:

"Dil normaları hazırda tələblərə cavab vermir. Dilçi alimlər də bununla məşğul olmaq əvəzinə, bu işi taleyin ümidinə buraxıblar".

Prezidentin 2013-ci ildə Azərbaycan dilinin qloballaşma şəraitində zamanın tələblərinə uyğun təbii imkanları hesabına inkişafı ilə bağlı unikal sərəncamını xatırladan A.Niftəliyev təəssüflə qeyd edib ki, bu cür rəsmi himayəyə baxmayaraq, dilçi alimlər və dil normasını zamanın tələblərinə uyğunlaşdırmalı olanlar işləmir".

Qeyd edək ki, konfransda Dilçilik İnstitutunun iştirak etməməsi müəyyən narazılıq yaradıb və Sabir Rüstəmxanlının haqlı iradına səbəb olub.

Konfrans hazırda davam edir.