Ölkədə sərt karantin tədbirlərinin yumşaldılması, xüsusilə parkların açılması, küçəyə çıxmaqla bağlı qadağanın ləğv edilməsi şəhər gəzintisinə gələnlərin sayını artırıb.

Axar.az xəbər verir ki, paytaxtın Nizami küçəsində (“Torqovı”) restoran və kafelər işləməsə də, gəzintiyə çıxanların sayında artım müşahidə olunur. Mərkəzi küçədəki geyim mağazaları gecə yarısına qədər işləyir. Restoran və kafelərin bəziləri isə 18:00-dan sonra onlayn fəaliyyətə başlayır. Növbəli şəkildə sifarişlər qəbul olunur və müştərilərə qapıda xidmət göstərilir. Bu səbəbdən bir çox kafenin qarşısında növbələr yaranır.

Mərkəzdə əvvəllər daha çox ailələr gözə dəyirdisə, bugünlərdə mənzərə fərqlidir. İndi daha çox gənclərə rast gəlmək mümkündür. Tək-tük səyyar satıcılar da gözə dəyir: popkorn, qarğıdalı, şabalıd satanlar...

Novruz bayramı ərəfəsində mərkəzdə qurulan yarmarka hələ də yığışdırılmayıb. Mərkəzi küçədə gəzintini çətinləşdirən yarmarkanın kənarları ilə hərəkət etmək üçün yol ayrılıb ki, bu da hərəkət zamanı sıxlığa səbəb olur, heç bir məsafə saxlanılmır.

Maskadan istifadə edən isə demək olar ki, yoxdur. Bir çox hallarda sosial məsafə də qorunmur.