Xəstə 4 iyun tarixində ağciyər, qaraciyər, böyrək, yumurtalıqlarda baş verən narahatlıqlarla xəstəxanamıza daxil oldu. Daha əvvəl bir neçə xəstəxanaya müraciət etsə də, qəbul olunmamışdı.

Axar.az xəbər verir ki, xəbər verir ki, bunu “Bona Dea” Beynəlxalq Hospitalın invaziv radioloq, invaziv onkoloqu Nicat Alışov 22 yaşlı pasiyent Təbəssüm Məmmədovanın meyitinin ailəsinə təhvil verilməməsi ilə bağlı məsələ ətrafında keçirilən mətbuat konfransında deyib.

"Xəstəyə heç bir xəstəxanada biopsiya edilməsə də, mən bunu etdim və qanaxma olmadı. Xəstə ölümcül qanaxma ilə xəstəxanaya daxil olmuşdu və mən evdən təcili gələrək komandamı yığdım. Xəstə ölümcül halda idi və müdaxilə edərək onu xilas etdim. Hər bir əməliyyatın və müalicələrin ölüm riski daşıdığı ailə üzvlərinə bildirildi", - o bildirib.

Həkim qeyd edib ki, heç bir ölkədə xəstə yaxını müalicə məbləği üçün etiraz etmir: "Atası onu 15 ildir görmədiyini dedi. Heç bir həkim istəməz ki, xəstəsi vəfat etsin. Mənim işim diaqnoz qoymaq və xəstənin ömrünü uzatmaqdır.

Belə əməliyyatlar həyat xilas edir. Heç bir xəstənin bizim əməyimizə kölgə salmaq haqqı yoxdur. Mən toplumumuzun linç psixologiyasından məyus oldum. Belə fikirlər həkimlərimizin ölkəni tərk etməsinə səbəb olacaq. Məsələ ilə bağlı bütün hüquqi işlər görüləcək".