Mədən Sənayesində Şəffaflığın Artırılması Koalisiyası Neftçala şəhərində təlim keçirib.

MSŞA-dan Axar.az-a verilən məlumata görə, Mədən Sənayesində Şəffaflığın Artırılması (MSŞA) Koalisiyası Neftçala şəhərində "Mədən Hasilatı üzrə Şəffaflıq Təşəbbüsü (MHŞT) haqqında ictimai məlumatlılığın artırılmasına" həsr olunmuş tədbir keçirib.

Vətəndaş cəmiyyəti təşkilatları, dövlət qurumları, KİV, bələdiyyə, yerli icmalar və hasilat sənayesi şirkətlərinin 70-dən artıq təmsilçisinin iştirak etdiyi tədbirin məqsədi MHŞT və bu təşəbbüsün Azərbaycanda tətbiqi haqqında məlumatlılığı artırmaq olub. Qeyd edək ki, rayon ərazisində neft hasil edilir.

Tədbir MHŞT üzrə Katiblik və Dünya Bankının dəstəyi ilə MSŞA Koalisiyası tərəfindən təşkil edilib. Tədbirin təşkili MHŞT üzrə çox tərəfli qrupun fəaliyyət planında nəzərdə tutulub.

MSŞA Koalisiyasının Şura üzvü Mehriban Vəzir "Mədən Hasilatında Şəffaflıq Təşəbbüsü prosesində QHT Koalisiyasının tərəfdaşlıq rolu" mövzusunda təqdimat edərkən vurğulayıb ki, bütün Neftçala sakinlərini neft gəlirləri ilə bağlı daha məlumatlı olmağa və MHŞT prosesinin imkanlarından istifadə etməyə çağırırıq.

Qeyd edək ki, aprel ayında Gədəbəy rayonunda növbəti tədbirin keçirilməsi gözlənilir.