Hər bir Azərbaycan gənci kimi mən də gec-tez torpaqlarımızın düşmən işğalından azad olunacağı o müqəddəs günü səbirsizliklə gözləyirdim. Şükürlər olsun ki, torpaqlarımız bu gün işğaldan azad edilib. Fəxr edirəm və özümü şanslı insan bilirəm ki, 44 günlük Vətən müharibəsində iştirak etmişəm və torpaqlarımızın işğalında az da olsa, paya sahibəm.

Bu sözləri Axar.az-a açıqlamasında 44 günlük Vətən müharibəsinin könüllü iştirakçısı Vüsal Fikrət oğlu Qurbanlı bu gün Prezidentin təltif etdiyi hərbçilər sırasında adının olması haqda danışarkən deyib.

V.Qurbanlının sözlərinə görə, təltifdən xəbəri olmayıb, az öncə dostları ona “Qubadlının azad olunmasına görə” medalı ilə təltif edildiyini deyiblər:

“Etiraf edim ki, belə bir şey gözləmirdim. Çünki mənim üçün ən böyük təltif, medal elə torpaqlarımızın düşmən işğalından azad edilməsidir. Əmim Mikayıl Oruc oğlu Qurbanov Birinci Qarabağ müharibəsinin könüllü iştirakçısı olub. 3 dəfə yaralansa da, torpaqlarımız uğrunda döyüşməkdən geri durmayıb. Babam Oruc Qurbanlı da 20 Yanvar hadisələri zamanı yaralanıb. Belə bir ailənin üzvü kimi döyüşdə olmamağım mümkün deyildi.

Bu gün torpaqlarımızın əsl sahibində olması, zənnimcə, bizlər üçün ən böyük mükafat, sevincdir. Bununla belə, “Qubadlının azad olunmasına görə” medalı ilə təltif edilmək böyük qurur və şərəfdir. Silahlı Qüvvələrin Müzəffər Ali Baş Komandanı İlham Əliyevə təşəkkürümü bildirirəm. Allahdan Vətənimiz uğrunda canını qurban verən bütün şəhid qardaşlarıma rəhmət, qazi qardaşlarıma şəfalar diləyirəm”.