Artıq nikaha daxil olmaq istəyən vətəndaşlar tibbi müayinədən keçdiklərini təsdiq edən arayışı pilot layihə çərçivəsində 5 saylı Bakı "ASAN xidmət" mərkəzində fəaliyyət göstərən Respublika Diaqnostika Mərkəzindən əldə edə bilərlər.

Bu barədə Axar.az-a qurumun İctimaiyyətlə əlaqələr şöbəsindən məlumat verilib.

Arayışın əldə edilməsi üçün nikaha daxil olmaq istəyən şəxslərin şəxsiyyətini təsdiq edən sənədlər, nikahın qeydə alınması üçün doldurulmuş ərizə-anketin surəti lazımdır.

Vətəndaşların tibbi müayinədən keçdiklərini təsdiq edən arayış 5 iş günü müddətində verilir və bunun üçün dövlət rusumu ödənilmir.

Məlumatda həmçinin bildirilib ki, yalnız "ASAN xidmət" mərkəzləri daxilində nikaha daxil olmaq istəyən şəxslər bu xidmətdən yararlana biləcəklər.

Qeyd edək ki, bir neçə gün öncə Axar.az-a dövlət poliklinikalarında nikah öncəsi tibbi analizlər üçün vətəndaşlardan pul tələb edilməsi ilə bağlı şikayət daxil olmuşdu.

Toy öncəsi tibbi müayinədən keçən gənclərdən biri (adının hallanmasını məlum səbəbdən istəmədi – red.) ötən ilin may ayında yeni binası istifadəyə verilən Yasamal rayonundakı 39 saylı şəhər poliklinikasında tibbi müayinəyə gedən gənclərdən cavablar üçün pul tələb edildiyini bildirmişdi.

"ASAN xidmət"in tərkibində bu xidmətin göstərilməsi daha bir sahədə rüşvətin kökünün kəsilməsinə səbəb oldu.