Kəlbəcərdə öldürülən Həsən Həsənovun Qənirə Paşayevaya çatmayan məktubu üzə çıxıb.

Axar.az xəbər verir ki, bu barədə Modern.az saytına H.Həsənovun qardaşı Nail Həsənov məlumat verib.

N.Həsənov qeyd edib ki, məktubu mərhum qardaşına məxsus avtomobili təmizləyərkən tapıb:

"Rəhmətlik qardaşımın şəxsi avtomobilini təmizləyərkən onun deputat Qənirə Paşayevaya ünvanladığı qaralama məktubunu tapmışam. Həsən həmin məktubda torpaqlarımızın işğalına, neçə-neçə girov və əsirlərimizin erməni əsarətində qalmağına, dədə-baba qəbirlərinin dağıdılmasına dözə bilmədiyini və Qarabağa gedəcəyini yazıb. Məktubu yazmaqla deputatdan ona ən azından mənəvi dayaq durmasını istəyib".

Qeyd edək ki, Dilqəm Əsgərov və Şahbaz Quliyev 2014-cü il iyunun 29-da yaxınlarının qəbirlərini ziyarət etmək üçün doğma yurdlarına - Kəlbəcərin Şaplar kəndinə gedərkən Ermənistan ordusu tərəfindən girov götürülüblər. Girov götürülərkən onlarla getmiş mülki azərbaycanlı Həsən Həsənov öldürülüb, onun meyiti danışıqlardan sonra Azərbaycana qaytarılıb və dəfn olunub.

Şahbaz Quliyev və Dilqəm Əsgərov bir neçə maddə ilə ittiham olunub. Ermənilərin qurduğu "məhkmə qərarı" ilə D. Əsgərov ömürlük həbs, Ş. Quliyev isə 22 il müddətinə azadlıqdan məhrum edilmə cəzasına məhkum olunub.