Şabranda heyvanlar arasında brusellyoz xəstəliyinin kütləvi şəkildə yayılması ilə bağlı deyilənlər təsdiqini tapmayıb.

Bu barədə Axar.az-a Kənd Təsərrüfatı Nazirliyi yanında Dövlət Baytarlıq Nəzarəti Xidmətindən (DBNX) məlumat verilib.

9 ay ərzində Şabranda saxlanılan 13688 baş iribuynuzlu heyvandan, 2 min baş ana qoyundan, 1680 baş qoçdan brusellyoz xəstəliyinə görə diaqnostik məqsədlə qan alınıb.

Aparılan seroloji müayinə nəticəsində ayrı-ayrı vaxtlarda və ayrı-ayrı təsərrüfatlarda 7 baş iribuynuzlu, 2 baş xırdabuynuzlu heyvanın qanı müsbət reaksiya verib. Qalan heyvanlarda isə xəstəliyin törədicisinə təsadüf edilməyib.

Şabranda xırdabuynuzlu heyvanlar arasında brusellyoz xəstəliyinə qarşı "Rev-1" ştampının göz-damcı üsulu ilə 10 min başa yaxın heyvanda profilaktik məqsədlə peyvəndləmə tədbiri aparılıb. Hazırda bu istiqamətdə tədbirlər davam etdirilir.