Təbiətə vurulan ziyanın həcmi 400-500 manatdan çoxdursa, o halda vətəndaş dövlətə külli miqdarda ziyan vurmuş sayılır.

Bu sözləri Bioloji Müxtəlifliyin Qorunması Departamentinin direktor müavini Hikmət Əlizadə heyvanların qanunsuz ovlanması ilə bağlı məsələni Axar.az-a şərh edərkən deyib.

O bildirib ki, Azərbaycanda yüzlərlə heyvan növünün ovlanması qadağandır. Ovlanan heyvan növlərinə görə də cərimələrin məbləği dəyişir:

"Nazirlər Kabinetinin qərarına əsasən, cərimələr müəyyənləşdirilir. Çöl pişiyinin (vaşaq) ovuna görə 2000 min, ceyran ovuna 500, qartal ovuna 300, qara leyləyin ovuna görə isə 500 manat məbləğində müxtəlif cərimələr nəzərdə tutulub. Hətta sürünənlərin qanunsuz tutulması və ovlanması ilə bağlı cərimələr var. Məsələn, Aralıq dənizi tısbağasının qanunsuz ovuna görə 60 manat məbləğində cərimə nəzərdə tutulub".

H.Əlizadənin sözlərinə görə, bəzi qadağa edilən ovlara görə cinayət məsuliyyəti də nəzərdə tutulub:

"Təbiətə vurulan ziyanın həcmi 400-500 manat məbləğindən yuxarıdırsa, o halda dövlətə külli miqdarda ziyan vurulmuş sayılır. Bu zaman cinayət işi açılır, qərar çıxarılması üçün iş müvafiq məhkəmə orqanlarına göndərilir. Daha sonra artıq həmin şəxsin işinə baxılır".

H.Əlizadə bildirib ki, vətəndaş ov etməzdən əvvəl müvafiq qurumlardan lisenziya almalıdır:

"Ekologiya və Təbii Sərvətlər Nazirliyi ov mövsümünü açıq elan etdikdən sonra, vətəndaş mövsümə uyğun olaraq ova gedə bilər. Ov mövsümü elan ediləndə Kütləvi İnformasiya Vasitələrində və nazirliyin rəsmi saytında elan yerləşdirilir".

Direktor müavini qeyd edib ki, vətəndaş ova gedəndə Ekologiya və Təbii Sərvətlər Nazirliyinin müvafiq şöbəsindən lisenziya almalıdır:

"Bu icazəyə görə dövlətin bank hesabına pul keçirilməlidir. Daha sonra Daxili İşlər Nazirliyinin müvafiq icazəsi əsasında qanuni ov silahı ilə ov etməlidir. Yalnız bu halda vətəndaşın ovu qanuni sayılır".