Standartlaşdırma, Metrologiya və Patent üzrə Dövlət Komitəsi bu tələbləri qoya bilər. Amma unutmaq olmaz ki, toyun yaxşı keçməsi üçün üç əsas şərt var: yaxşı qulluq, yaxşı yemək və yaxşı musiqi.

Bu sözləri Axar.az-a "Xan bağı" şadlıq sarayının administratoru Namiq Fərzəliyev deyib.

Onun sözlərinə görə, toyda musiqinin aşağı səslə olması arzuolunan bir tələb deyil. N.Fərzəliyev qeyd edib ki, musiqinin hansı səviyyədə səsləndirilməsi haqda toy sahibi seçim edir: "Musiqinin səs yüksəkliyi toy sahibinin zövqünə uyğun seçilir.

Təbii ki, toy yüksək səslə olmalıdır. Unutmaq lazım deyil ki, bu, gənclərin, cavanların toyudur. Gənclər isə yüksək səsli musiqi arzusunda olur.

Buna görə də Standartlaşdırma, Metrologiya və Patent üzrə Dövlət Komitəsi qonaqların istəyinə hədd qoya bilməz".

"Viktoriya" şadlıq sarayının baş meneceri Sahib Əsgərov da qərarın mümkün iş olmadığı fikrindədir: "Hətta 5 belə qərar olsun, yenə şadlıq evlərində musiqinin səsi yüksək olacaq. Çünki bu, birbaşa toy sahibinin qərarıdır".

"Monte Kristo" şadlıq sarayının rəhbərliyi də sözügedən tələbin toy sahibinin etirazına səbəb olacağını hesab edir:

"Bütün toy sahibləri musiqiçiləri özü dəvət edir. Musiqini azaltmaq imkanımız olmur. Əgər bunu edəriksə, toy sahibinin etirazına səbəb olar. Heç biz də, yüksək səsli musiqinin tərəfdarı deyilik", - deyə şadlıq evinin baş meneceri İqbal Alıyev bildirib.

Qeyd edək ki, Standartlaşdırma, Metrologiya və Patent üzrə Dövlət Komitəsindən verilən məlumata görə, şadlıq evlərində musiqi çalınarkən istifadə edilən səsin gücü 85 desibeldən yüksək olmamalıdır.