Azərbaycanlı jurnalist Vüqar Abbasovun rəhbərlik etdiyi "Konnekt" təşkilatının katibi Vim van Embden Axar.az-a müsahibə verib:

- Özünüzü Azərbaycan oxucularına necə təqdim edərsiz?

- Mən, Vim van Embden 1959-cu ildə Niderlandda dünyaya gəlmişəm. 1990-cı ildə ildə Rotterdam şəhərindəki Erasmus Universitetini hüquq ixtisası üzrə bitirmişəm. Müxtəlif işlərdə çalışmışam. 1995-2009-cu illərdə Kurasavoda yaşamış və 2009-cu ildə yenidən Niderlanda dönmüşəm. Hazırda Niderland Qaçqınlarla İş üzrə İdarədə və Niderland Statistika İdarəsində çalışıram. Ailəliyəm, bir övladım var.

- Nə üçün "Konnekt"ə qatıldınız? Sizi Azərbaycana nə bağlayır?

- Mən "Konnekt"in yaradıcılarındanam. Artıq bir neçə ildir ki, Vüqarla ("Konnekt" dəki həmkarı) bir yerdə işləyirdim və onunla vaxtaşırı Azərbaycanla, xalqınızla bağlı söhbətlər edirdik. Bilirsiniz ki, indi Avropada və həmçinin Niderlandda çoxsaylı qaçqınlar var və onların yardıma ehtiyacları var. Biz də qərara gəldik ki, bir təşkilat yaradaq və o zaman Vüqar təşkilatı həm də bir diaspor təşkilatı olaraq yaratmağı təklif etdi. Səbəbini də belə izah etdi ki, bu vasitə ilə həm də öz Ana Vətəninə (biz niderlandlılar Ata Vətən deyirik - Vim) xidmət etmiş olar. Biz də öz növbəmizdə buna razılıq verdik və beləcə "Konnekt" yarandı.

- Planlarınız nədir və nə etməyi düşünürsüz? Təbii ki, bizi Azərbaycanla bağlı planlarınız maraqlandırır.

- Öncə onu qeyd edim ki, təşkilat yeni yaradılmasına baxmayaraq, artıq bizi yaşadığımız ərazidə çoxları tanıyır. Bir çox görüşlər keçirmişik ki, onlar barədə hələlik mətbuata məlumat vermək istəmirik. Son iki ayda yerli mətbuatda təşkilatımızla bağlı bir neçə yazı gedib, Vüqarın radio ilə 20 dəqiqəlik çıxışı oldu. Bu yazı və çıxışlardan sonra elektron poçtumuza yetərincə məktublar daxil oldu və insanlar bizim təşkilatla maraqlanmağa başladılar. Təbii ki, bu bizi sevindirir. Ancaq deyim ki, biz niderlandlılar, xüsusən bizim bölgənin insanları bu kimi məsələlərdə tələskənliyə yol verməyi sevmərik. Bunu mən bir niderlandlı kimi bilir və ona görə də gələcəkdə sıralarımızın daha da genişlənəcəyinə ümid edirəm. Bundan başqa, hər halda məlumatınız olar ki, bir müddət öncə Niderlandda bir tədbir keçirildi və sizin işğalda olan ərazinizdən, Dağlıq Qarabağdan da bir nəfər ora deputat kimi qatılmışdı. Həmçinin Niderland parlamentinin bir deputatının adı da tədbirə qatılanlar sırasında idi. Niderland demokratik bir ölkədir, ona görə də biz kiməsə nəyisə etməyi qadağan edə bilmərik, təbii ki, Niderland qanunları çərçivəsində. Ancaq bu demokratiya mənə və burda yaşayan hər kəsə də öz sözünü demək hüququ verir və mən də öz hüququmdan istifadə edərək öz adımdan sözügedən tədbirin keçrildiyi Amsterdam Azad Universitetinə, Niderlanddan olan millət vəkilinə etiraz məktubları göndərdim. Mən bunu ona görə etdim ki, bu məsələdə ədalətin sizin tərəfinizdə olmasına inanıram, Vüqar məni buna inandıra bilib.

Planlara gəlincə onu deyə bilərəm ki, planlarımız genişdir. Kütləvi tədbirlərə çox üstünlük verməyi düşünmürük, ancaq bu heç də o anlamda deyil ki, kütləvi tədbirlər təşkil etməyəcəyik. Qeyd etdiyim kimi, biz niderlandlıların xarakterlərinə uyğun olan tədbirləri təşkil etməyə və orda Azərbaycan həqiqətlərini çatdırmağa çalışacağıq. Bir niderlandlı kimi mən bunu necə etməli olduğumuzu bilirəm. Yerli mətbuat və siyasət adamları ilə işləməyə çalışacağıq, çünki sizin həmyerliniz və indi həm də mənim həmyerlim Vüqarın bu işdə təcrübəsi və ən əsası istəyi var. Ola bilər ki, Niderland dilində bir internet qəzeti də yaradaq. İki ölkənin arasında iqtisadi əlaqələr yaratmağa çalışacağıq, həm iş, həm də siyasət adamlarının qarşılıqlı səfərlərini təşkil etməyi düşünürük. Eyni zamanda Azərbaycanda da tədbirlər təşkil etməyi planlaşdırırıq...

- Azərbaycanda olmusunuzmu?

- Təəssüf ki, yox. Digər niderlandlı kimi mənim Azərbaycanla bağlı bilgilərim çox deyildi. Ancaq mən çox istərdim ki, ölkənizə gəlim, sizləri daha yaxından tanıya bilim. İnanıram ki, orda olsam və xalqınızı daha yaxından tanısam, bu mənə imkan verər ki, Azərbaycanı Niderlandda daha yaxşı təqdim edim. Hələlik mənim məlumatım Vüqarın mənə danışdıqlarından, internet üzərindən göstərdiyi videolardan və bir də Azərbaycanın Niderlandda fəaliyyət göstərən səfirliyinin əməkdaşlarının mənə bağışladığı kitabdan öyrəndiklərimlə məhdudlaşır. Ancaq bir daha qeyd etmək istəyirəm ki, məmnuniyyətlə ölkənizə gəlmək istəyirəm.