Tələbə Qəbulu üzrə Dövlət Komissiyası (TQDK) 2016-cı il martın 6-da 2016-2017-ci tədris ili üçün ali təhsil müəssisələrinin və Azərbaycan Milli Elmlər Akademiyasının magistratura səviyyəsinə qəbul imtahanının birinci mərhələsini keçirəcək.

TQDK-nin mətbuat xidmətindən Axar.az-a verilən məlumata görə, imtahan respublikanın 6 şəhərində - Bakı, Naxçıvan, Gəncə, Mingəçevir, Şəki və Lənkəran şəhərlərində, ümumilikdə 41 imtahan mərkəzində aparılır.

İmtahan bütün binalarda eyni vaxtda - saat 13:00-da başlanır.

Ərizə vermiş bakalavrlar imtahanda iştirak etmək üçün TQDK-nın internet saytına daxil olaraq iş nömrəsi və şifrlərindən istifadə etməklə "Bakalavrın imtahana buraxılış vərəqəsi"ni çap etməlidirlər. Burada bakalavrların imtahan verəcəyi şəhər, bina və digər məlumatlar qeyd olunur.

Bakalavrlar imtahana gələrkən aşağıda göstərilən sənədləri mütləq özləri ilə gətirməlidirlər:

- Şəxsiyyəti təsdiq edən sənədin əslini;

- "Bakalavrın imtahana buraxılış vərəqəsi"ni.

Göstərilən sənədlər arasında uyğunsuzluq olarsa, yaxud həmin sənədlərdən biri olmazsa, bakalavr imtahana buraxılmayacaq.

Bu mərhələdə bakalavrlara ümumi intellektin (məntiqi təfəkkürun) inkişaf səviyyəsinin yoxlanılması üçün 50 (5-i açıq tipli), informatika üzrə 25 (5-i açıq tipli) və xarici dil üzrə 25 (5-i açıq tipli) test tapşırığı təqdim olunur. Sualların cavablandırılmasına 2 saat 30 dəqiqə vaxt ayrılır. Bakalavrın hər bir test tapşırığına düzgün cavabı bir balla qiymətləndirilir, səhv cavablar düzgün cavabların nəticəsinə təsir göstərmir.

Ərizələrin qəbulu internet vasitəsilə fevralın 10-dan 19-dək aparılıb. İmtahanda iştirak etmək üçün 24110 (ötən il 23231) bakalavr ərizə təqdim edib. Onlardan 21822 nəfəri Azərbaycan bölməsi, 2288 nəfəri rus bölməsi üzrə imtahan verəcək. Ərizə verənlərin 10281 nəfəri oğlan, 13829 nəfəri isə qızlardır. Bakalavrlardan 11550 nəfəri cari ilin məzunları, 12560 nəfəri isə əvvəlki illərin məzunlarıdır. 63 nəfər xarici ölkə vətəndaşıdır. İmtahanda iştirak edəcək ən yaşlı bakalavr 1958-ci il təvəllüdlü, ən gənc isə 1997-ci il təvəllüdlüdür.

Qəbul imtahanı Bakı şəhərində 32, Gəncə şəhərində 4, Naxçıvan 2, Mingəçevir, Şəki və Lənkəran şəhərlərinin hər birində 1 binada təşkil olunacaq. Bakıda 19905, Naxçıvanda 758, Gəncədə 2185, Mingəçevirdə 476, Şəkidə 371, Lənkəranda isə 415 bakalavrın imtahan verəcəyi gözlənilir.

İmtahanın idarə olunmasına 168 imtahan rəhbəri, 1828 nəzarətçi-müəllim cəlb olunacaq.

Bütün bölgələrdə qəbul imtahanının gedişini TQDK-da akkreditasiyadan keçmiş 30-dək KİV nümayəndəsi müşahidə edəcək.