Misir və Türkiyədə kurortların bağlanmasından sonra rusiyalılar yeni turistik istiqamətlər axtarmağa başladılar. Nəticədə keçən il əsas xətlərdən biri Tiflis oldu, amma bu il ona Qafqazdakı qonşusu Bakı da yoldaşlıq edə bilər.

Axar.az xəbər verir ki, bu sözlər jurnalist Artyom Ryazantsevin "Lenta.ru" saytındakı "Bakı paradoksu" yazısında yer alıb. Müəllif məqalədə Azərbaycandakı bir çox yerlərin rus turistlərin marağını cəlb edə biləcəyini söyləyib:

"Bakıda başqa keçmiş sovet respublikalardan fərqli olaraq, hər kəs rusca danışır və bunu məmnuniyyətlə edirlər. Sirr təkcə ənənəvi Şərq qonaqpərvərliyində yox, həm də siyasətdədir. SSRİ-nin parçalanmasından sonrakı 25 ili bizim ölkələr dostluq şəraitində keçiriblər. Ona görə də Azərbaycan nadir ölkələrdən biridir ki, burada ruslar əvvəlki kimi arzu olunan qonaqlardır. Restoranda rus dilində menyu yoxdurmu? Problem deyil, ofisiant məmnuniyyətlə sizə yerli yeməklər haqqında danışar. Tikə, lülə kabab, Bakı pomidorları... Ad hamınıza tanışdır, amma əgər Bakıda bunun dadına baxmamısınızsa, o zaman hesab edin ki, ümumiyyətlə, bunun dadını bilmirsiniz. Naharın sonunda vacib ritual – kəklikotulu çay, ev mürəbbəsi, üstəgəl Şərq şirniyyatları ilə birgə".

Məqalədə həmçinin Azərbaycanın milli mətbəxindən, neft bumunun tarixindən, Bakının arxitekturasının müxtəlifliyindən də söhbət açılır.