Azərbaycan ötən il kərə yağı idxalını 78% artırıb və bu da o deməkdir ki, bizdə yağ istehsalı o qədər də çox deyil.

Bu sözləri Axar.az-a açıqlamasında kənd təsərrüfatı eksperti Vahid Məhərrəmli ötən il Azərbaycanın Rusiyaya 940 ton kərə yağı ixrac etməsini şərh edərkən deyib.

Ekspert bildirib ki, buna baxmayaraq, öz istehsalımızın ehtiyac duyulduğu halda baha satılmasında qəbahət yoxdur:

"Rusiyaya ixrac olunan yağa gəldikdə isə qeyd edim ki, ötən il Rusiyada kərə və digər yağların qiymətində kəskin artım olub. Ona görə də Türkiyə, ərəb ölkələrinin ardınca Azərbaycana kərə yağının tədarükü üçün müraciət olunub. Ötən il bu hadisə tək yağda yox, yumurta istehsalında da özünü göstərib. Azərbaycan istehsalçıları isə bu fürsəti dəyərləndiriblər".

Qeyd edək ki, ötən il Azərbaycandan Rusiyaya 940 ton kərə yağı ixrac edilib ki, bu da bir il əvvəlkindən (240 ton) 4 dəfə çoxdur.