Aprelin 3-də “Azərbaycan Dillər Universitetinin məzunlarının professionallıq və peşə vərdişlərinin təkmilləşdirilməsi” 2-ci regional (Balakən, Qax, Qəbələ, Oğuz, Şəki, Zaqatala) konfransı işinə başlayıb.

Axar.az xəbər verir ki, iki gün davam edəcək səfər çərçivəsində bir sıra elmi görüşlərin, tədbirlərin keçirilməsi nəzərdə tutulub.

Səfər çərçivəsində ADU-nun rektoru akademik Kamal Abdulla, pedaqoji heyət və tələbələr ADU məzunları ilə görüşəcək, elmi-pedaqoji seminarlarda iştirak edəcəklər.

“Azərbaycan Dillər Universitetinin məzunlarının professionallıq və peşə vərdişlərinin təkmilləşdirilməsi” 2-ci regional konfransın ilk günü nəzərdə tutulan məzunlarla metodiki seminarlar (4 bölmə) - Dil bacarıqları (ingilis dili) – dos. Vəfa Babayeva, dos. Vüsalə Ağabəyli, Hüzurə Ağayeva; Dil bacarıqları (alman dili) – dos. Naibə Camalzadə, Lətifə Qurbanova; Dil bacarıqları (fransız dili) – prof. Gülnarə Sadıxova, Jalə Salmanova; Xarici dilin tədrisində psixoloji və pedaqoji aspektlər – prof. Hikmət Əlizadə; dos. Misgər Məmmədov və Samirə Həsənova tərəfindən keçirilib.

Qeyd edək ki, Azərbaycan Dillər Universitetinin rəhbərliyi məzunlarla iş və karyera imkanlarının qiymətləndirilməsi, məzunların təhsil keyfiyyətlərinin artırılması istiqamətində silsilə tədbirləri keçirir. Məzunların karyera imkanlarını təhlil etmək, pedaqoji kadrların bilik və bacarıqlarının artırılması istiqamətində seminarlar, təlimlər keçirmək ADU-nun təhsil strategiyasının uğuru deməkdir.