Aprelin 8-də “AzerGold” QSC və Pakistan İslam Respublikasının “Frontier Works Organization” şirkəti arasında birgə əməkdaşlıq haqqında Anlaşma Memorandumu və Məlumatların Gizli Saxlanılması (NDA – Non-disclosure agreement) sənədi imzalanıb.

Axar.az xəbər verir ki, Azərbaycanın iqtisadiyyat naziri Mikayıl Cabbarovun başçılıq etdiyi Azərbaycan nümayəndə heyətinin Pakistana səfəri və Pakistan Mineral İnvestisiya Forumu çərçivəsində paytaxt İslamabad şəhərində təşkil olunan mərasimdə sənədləri AzerGold QSC-nin İdarə Heyətinin üzvü – sədrin müavini Xəyyam Fərzəliyev və “Frontier Works Organization” şirkətinin faydalı qazıntıların kəşfiyyatı və inkişaf əməliyyatları üzrə direktoru Muhammad Badr Malik imzalayıblar.

Dağ-mədən və geologiya sahələrində birgə əməkdaşlığın qurulması məqsədilə imzalanan sənədlərə əsasən, tərəflər arasında Azərbaycan, Pakistan, eləcə də digər ölkələrin ərazilərində faydalı qazıntı yataqları ilə bağlı mövcud geoloji məlumatların öyrənilməsi, birgə geoloji kəşfiyyat proqramları, mədən layihələrin icrası ilə bağlı təkliflərin hazırlanması nəzərdə tutulub. Həmçinin sənədlərdə məlumat və təcrübə mübadilələrinin aparılması, qarşılıqlı səfərlərin davam etdirilməsi ilə bağlı tərəflər öz niyyətlərini ifadə ediblər.

Xatırladaq ki, cari ilin 25 fevral tarixində AzerGold QSC-də Azərbaycan-Pakistan Biznes Forumu çərçivəsində ölkəmizdə səfərdə olan “Frontier Works Organization” şirkətinin Baş icraçı direktoru Abdul Saminin başçılıq etdiyi nümayəndə heyəti ilə görüş keçirilmişdi. Görüşün yekunu olaraq tərəflər arasında əməkdaşlığın konkret istiqamətlərinin müəyyənləşdirilməsi üçün məsləhətləşmələrin aparılması, məlumat mübadiləsinə dair NDA sənədi, eləcə də əməkdaşlığa dair Anlaşma Memorandumunun hazırlanması və imzalanması barədə razılıq əldə edilmişdi.