Ermənistan və İran silahlı qüvvələrinin xüsusi təyinatlılarının iki ölkənin sərhədində birgə təlimlər keçirməsi ilə bağlı BBC də material yayıb.

Axar.az xəbər verir ki, materialda aprelin 9-u və 10-da keçirilən təlimlərin “sərhəd keçid məntəqələrinə simulyasiya edilmiş terrorçu qrupların hücumlarının zərərsizləşdirilməsi üzrə tədbirləri” əhatə etdiyi bildirilib.

Vurğulanıb ki, əslində qısamüddətli və yerli hadisə olan bu təlimlər regionun geosiyasətində genişmiqyaslı dəyişiklikləri əks etdirir. Belə ki, təlimlər SSRİ-nin dağılmasından bəri Rusiya FTX-nin Sərhəd Xidməti tərəfindən qorunan Aqarak/Norduz sərhəd məntəqəsinin ətrafında aparılır. Bu ərazidə rus sərhədçilər 2025-ci ilin yanvarından erməni sərhədçilərlə əvəzlənib.

“İran-İsrail və İran-Amerika qarşıdurmasının kəskinləşməsi fonunda Co Bayden administrasiyasının son günlərində bağlanan ABŞ-Ermənistan strateji tərəfdaşlıq sazişi İran siyasətçilərini narahat etməyə bilməz.

Ermənistan və İran xüsusi təyinatlılarının tarixdə ilk dəfə birgə təlimlərinin keçirilməsi onu göstərir ki, erməni diplomatlar iranlı həmkarlarını İrəvanın qərbyönlü kursunun cənub qonşusuna qarşı yönəlmədiyinə inandıra biliblər”, - BBC qeyd edib.